«Վերջերս Նիկոլ Փաշինյանն այցելել էր սահմանամերձ գոտի, որտեղ տարածքներ պետք է հանձնեն եւ ահաբեկել էր ժողովրդին պատերազմով: Բա եթե այդպես պարզապես հիստերիկ կրակում են, որեւէ վտանգ չկա, ուրեմն պետք չի նաեւ ժողովրդին վախեցնել»,- այսօր լրագրողների հետ ճեպազրույցում ասաց «Հայաստան» խմբակցության պատգամավոր Արմեն Ռուստամյանը:
Նա ասաց, որ իշխանությունները ստեղծում են տպավորություն, թե ուրիշ ճանապարհ չունենք՝ պետք է հանձնենք ու ծրագիր ունեն կտոր-կտոր հանձնելու, Ադրբեջանի պահանջները բավարարելու. «Բանակցությունները հստակ միջազգային ձեւաչափով տեղի չեն ունենում, ինչ-որ բանավոր պայմանավորվածություններ են, որոնք զուգորդվում են սահմանային լարվածություններով, որպեսզի Ադրբեջանը, Թուրքիան ստանան իրենց համար ընդունելի արդյունքներ ու հասնեն իրենց նպատակին»:
Հարցին՝ խնդիրը միայն այդ 4 գյուղե՞րն են, թե՞ այդ կրակոցների նպատակն ավելի հեռու է գնում՝ նա պատասխանեց. «Իհարկե, հեռու գնացող է: Իրենք երբեք էլ կանգ չեն առել որեւէ պահանջի վրա, ժամանակին անկեղծության պոռթկում ունենալով՝ Նիկոլ Փաշինյանն ինքն է դա հաստատել: Ասում էր՝ մենք պատրաստ ենք զիջել, պարզապես չգիտենք՝ մինչեւ ինչքան զիջենք, որ իրենց բավարարենք: Ես գիտեմ՝ մինչեւ ինչքան պետք է զիջենք, որ բավարարենք մինչեւ հայկական ինքնության, հայկական գործոնի վերացումը եւ ՀՀ-ի վերածումը Արևմտյան Ադրբեջանի, սա է նրանց ուզածը ու բնականաբար դա իրականացվում է մեր շուրջ այս ահաբեկչական մթնոլորտը ստեղծելով: Մենք էլ անընդհատ ասում ենք՝ թույլ ենք, անկարող ենք, ամենաբարենպաստ պայմաններն ենք ստեղծում:
Ես չեմ բացառում, որ Ադրբեջանն այս անգամ նաեւ լայնամասշտաբ հարձակման գնա, որ միանգամից խնդիրը լուծվի: Լոկալ բախումներով հասել է լոկալ արդյունքների, բայց այս անգամ կարծում եմ՝ իրենց նպատակը շատ ավելի գլոբալ է ու այդ գլոբալ խնդիրը լուծելու համար մենք ինքներս պատերազմով այդ հարցը լուծելու պարարտ հող ենք ստեղծել: Երբ որ մենք ասում ենք, որ այդ տարածքներն իրենցն են, արդեն հրավիրում ենք, որ այդ տարածքներ մտնեն ցանկացած եղանակով, այդ թվում նաեւ զորքով»:
Կարդացեք նաև
Հռիփսիմե ՋԵԲԵՋՅԱՆ
