«Քաղաքական իրավունքի հայկական կենտրոնը» հետամուտ է լինելու այս գործին` թե ձերբակալման, թե խոշտանգման դրվագներով. այս մասին, դատարանի մոտ, լրագրողների հետ զրույցում ասաց իրավապաշտպան Հովհաննես Խուդոյանը։
Այս պահին դատարանը քննում է երեկ ձերբակալված և խոշտանգված Սամվել Վարդանյանի կալանքի հարցը։ Նրան ձերբակալել էին ՔՊ-ական պատգամավոր Հակոբ Ասլանյանի հետ վիճաբանության համար։
Հովհաննես Խուդոյանը կատարվածը քաղաքացու նկատմամբ քաղաքական հաշվեհարդարի դասական օրինակ է համարում։ Ըստ նրա, այս գործում իրավունքի այնպիսի շատ և աղաղակող փաստեր կան, որ ՀՀ իշխանություններն ու իրավապահներն այդ խարանից չեն ազատվելու։ Գործի բոլոր դրվագներով ամբողջական զեկույցները կուղարկվեն միջազգային ատյաններ, իրավապաշտպան կառույցներ` ներառելով իշխանության հետ աֆիլացվող անձանց ու լրատվամիջոցների կողմից տարածվող ատելության խոսքը։
Հիշեցնենք, միջադեպից հետո, ՔՊ-ական պատգամավորները քաղաքացուն «ոչնչություն, «պատվեր կատարող» էին անվանում։
Կարդացեք նաև
Դատարանի մոտ ի աջակցություն Սամվելի, տարբեր քաղաքական ուժերի ներկայացուցիչներ ու պարզապես քաղաքացիներ են հավաքված։
Նելլի Գրիգորյան
