«Ցավոք, այսօր ՀՀ իշխանության ղեկին հայտնված այս խմբակն այլևս երբեք չի ներկայացնում հայ ժողովրդի հավաքական շահերը»,- Հայ դատի հանձնախմբերի և գրասենյակների խորհրդաժողովի ժամանակ հայտարարեց ՀՅԴ ԳՄ ներկայացուցիչ Իշխան Սաղաթելյանը։
Նա, նշելով, որ Հայ դատի գործունեությունը նույնականացվում է հայկական շահերի պաշտպանության հետ, ասաց․ «Ցավոք, այս օրերին ստիպված եք գործել առանց պետական աջակցության, հաճախ նաև հակառակ այս պահին իշխանության ղեկին հայտնված անձանց որդեգրած քաղաքականության, ինչը բազմակի անգամներ դժվարացնում է ձեր աշխատանքը»։
Փաստելով, որ տասնամյակներ շարունակ ՀՅԴ մարմինների աշխատանքը նպատակ ունի ՀՀ-ի շահերի պաշտպանության, Արցախի ինքնորոշման իրավունքի ճանաչման, Հայոց ցեղասպանության միջազգային ճանաչման ու դատապարտմանը, Իշխան Սաղաթելյանը հայտարարեց․ «Այսօրվա ՀՀ-ի իշխանություններն այս երեք նպատակներից հրաժարվել են։ Նրանք հանձնել են Արցախը, ուրացել են արցախահայերին, հրաժարվել են ցեղասպանության միջազգային ճանաչումից, փորձում են ՀՀ-ն դատարկել, դարձնել թուրք-ադրբեջանական տանդեմի կամակատար, միջազգային ասպարեզում զրո դերակատարությամբ, անհեռանկար մի պետության։ Այս իրականության մեջ ձեր առաքելությունն ավելի պահանջված է դառնում»։
Կարդացեք նաև
Տաթև ՀԱՐՈՒԹՅՈՒՆՅԱՆ
