Այսօր Գեղարքունիքի մարզի Սեւանի նստավայրում հարցաքննվեց 2022-ի հունվարի 19-ին Ազատ գյուղի զինվորական կացարանում բռնկված հրդեհի ու դրա հետեւանքով 15 զինվորի մահվան դեպքի քննության գործով վկա գնդապետ Արսեն Սարոյանը: Նա ճգնաժամային ազգային կենտրոնի պետի տեղակալն է: Այս վկան առանցքային վկաներից է համարվում, քանի որ դեպքի հենց հաջորդ օրը Հանրային հեռուստաընկերության եթերով պաշտոնական տեղեկատվություն էր տարածել դեպքի մասին՝ հայտնելով, որ մահացած զինվորներից 14-ը եղել են մահճակալների վրա, մեկը՝ վառարանի մոտ: Այնինչ՝ իրականում քննությամբ ձեռք բերված ապացույցներով հաստատվել է, որ զինվորները չեն եղել մահճակալների վրա անշարժ պառկած, եղել են կացարանի տարբեր հատվածներում:
Այսօր նա դատարանին հայտնեց, որ նման տեղեկություն հայտնելուց օրեր հետո է հասկացել, որ սխալ տեղեկատվություն է հաղորդել: Նրա խոսքով՝ Հ1-ով հաղորդմանը մասնակցելուց մեկ օր առաջ ինքը փորձել է լրացուցիչ տեղեկատվություն հավաքել, ինչի ընթացքում փոխանցված տեղեկատվությունը սխալ է ընկալել:
Նրան հարց ուղղեցին զինվորների հարազատները:
Կարդացեք նաև
-Ո՞նց եղավ, որ Արգիշտի Քյարամյանն ու Աննա Վարդապետյանը կողքիդ նստած՝ Պետրոս Ղազարյանն էլ ասաց՝ սենց կասես, դու ասացիր, նրանք էլ հավանություն տվեցին: Հլը ասա դա: Նույն բանն այնտեղ ասացիր, Քյարամյանն ու Վարդապետյանը գլուխները տարուբերեցին, հավանություն տվեցին, Փաշինյանն էլ ծափ տվեց, հլը մի հատ պատասխանի, ինչի՞ համար սուտ խոսեցիր: Եքա մարդ ես, գնդապետ, ո՞նց թե՝ «սխալ ընկալեցի»,- զայրացավ զինվորի հարազատը:
Հրդեհի առաջացման պատճառների մասին տեղեկություն վկային հայտնի չէր, ասաց՝ իրենց նման տեղեկություն չեն տալիս:
Վկայի խոսքով՝ տելեգրամյան հարթակում իրենց աշխատանքային խմբից իմացել է՝ երկու մարտական հաշվարկ է եղել դեպքի վայրում:
Հարցին՝ հրդեհաշիջման աշխատանքները ժամանակի՞ն են կատարվել, վկան դրական պատասխան տվեց՝ հայտնելով, որ հատուկ վերլուծություն է արվել, ճգնաժամային ազգային կենտրոնը խախտումներ չի արձանագրել: Նա վստահեցրեց, որ դեպքի վայր ժամանակին են հասել, նույնիսկ՝ շուտ:
Տուժող կողմի ներկայացուցիչ Նորիկ Նորիկյանը վկայից հետաքրքրվեց՝ հնարավո՞ր է իրեն օգտագործել են կեղծ տեղեկատվությունը հանրությանը ներկայացնելու համար, ինչին ի պատասխան վկան կատեգորիկ հերքեց՝ պնդելով, որ սխալ է հասկացել իրեն փոխանցված տեղեկությունը:
Արփինե ՍԻՄՈՆՅԱՆ
