ՀՀ Քննչական կոմիտեի նախագահի տեղակալ, հատկապես կարեւոր գործերի քննության գլխավոր վարչության պետ Վազգեն Ավետիսյանը դիմել է ՀՀ փաստաբանների պալատ՝ Բագրատ սրբազանի պաշտպան Հովհաննես Խուդոյանի նկատմամբ կարգապահական վարույթ հարուցելու միջնորդությամբ:
Վազգեն Ավետիսյան
Խուդոյանը իր նկատմամբ վարույթ հարուցելու վերաբերյալ հաղորդման մասին երկու օր առաջ է Փաստաբանների պալատից ծանուցում ստացել:
Փաստաբանի նկատմամբ վարույթ հարուցելու հաղորդման պատճառը Փարաքարի համայնքապետի սպանության դեպքով սեպտեմբերի 29-ին Հանրային հեռուստաընկերության եթերում Քննչական կոմիտեի նախագահի հայտնած տեղեկությունների վերաբերյալ Խուդոյանի հրապարակային արձագանքն է:
Իսկ Հովհաննես Խուդոյանի արձագանքը հետեւյալն էր. «Քննչական կոմիտեի ղեկավարը երեկ լուրջ ու պատասխանատու դեմքով ի թիվս այլնի պնդում էր, որ սպանության գործով քաղաքական բան չկա:
Կարդացեք նաև
Բացի անուղղակի քաղաքական ազդեցությունը, ուղղակի քաղաքական միջամտության մասին տվյալներ այս պահին չունեմ: Բայց խնդիրն այլ է:
Նույն անձը երկու ամիս առաջ նույն դեմքով 18 արդարների գործով պնդում էր, որ պլանավորվել է մարդ գնդակահարել:
Իսկ հետո, երբ պարզվեց ու ապացուցվեց, որ հանրայինի եթերից ուղղակի ստել է, նույնիսկ ներողություն չի խնդրել հանրությանը մոլորեցնելու համար:
Փաստի ուժով Արթուր Պողոսյանի հայտարարությունների նկատմամբ տարածվում է ստելու կանխավարկածը»:
Քննչական կոմիտեի նախագահի տեղակալը իր միջնորդությունը հիմնավորել է նրանով, որ Խուդոյանը Փարաքարի համայնքապետի սպանության գործով չլինելով կողմ՝ իրեն իրավունք է վերապահել քննչական կոմիտեի նախագահի հասցեին հրապարակային հնչեցնել վիրավորական բնույթ կրող ոչ կոռեկտ արտահայտություններ, ինչը, ըստ Փաստաբանների պալատ դիմած պաշտոնյայի, կարող է բացասաբար անդրադառնալ ողջ քննչական կոմիտեի՝ որպես պետական ապարատի մաս կազմող կառույցի հեղինակության վրա:
Վազգեն Ավետիսյանը միջնորդել է ոչ միայն կարգապահական վարույթ հարուցել, այլեւ պատասխանատվության ենթարկել Խուդոյանին՝ դիտավորությամբ Փաստաբանության մասին օրենքն ու Կանոնագիրքը խախտելու համար:
Արփինե ՍԻՄՈՆՅԱՆ
