«Իրենց համար շատ հետաքրքիր հանգամանքներ արդեն Սամվել Կարապետյանը ներկայացրել է, դա ձայնագրառվել է՝ այդ թվում հենց քաղաքացիության վերաբերյալ շատ կարեւոր շեշտադրումներ է կատարել: Որոնց հենց ամենից շատ իրենք էլ սպասում էին: Ես այդ տեսանկյունից իրենց շնորհավորում եմ»,- այսօր լրագրողների հետ զրույցում ասաց «Ուժեղ Հայաստան» կուսակցության առաջնորդ Սամվել Կարապետյանի պաշտպաններից Արամ Վարդեւանյանը՝ մեկնաբանելով իշխանության որոշ ներկայացուցիչների արձագանքը՝ Կարապետյանի գործով դատական նիստի տեսաձայնագրության դեմ պաշտպանական թիմի առարկություններին:
«Մեզ համար էական նշանակություն ունի նույնիսկ մեկ ժամը, որ խափանման միջոցը փոխվի, որովհետեւ այդ մեկ ժամը կարող է ծառայել քաղաքական գործընթացներին պատշաճ մասնակցության համար: Մենք փաստացի երկու օրից արդեն զրկվել ենք, որի համաչափությունը, անհրաժեշտությունը չեմ կարողանում ընդունել»,- ասաց Վարդեւանյանը՝ անդրադառնալով խափանման միջոցի մասին դատարանի որոշման հետաձգմանը:
Փաստաբանը շեշտեց, որ տնային կալանքը պետք է վերանա, այն չի կարող ողջամիտ լինել. «2026 թվականի մարտի 14-ի դատական ակտում՝ նախագահությամբ Վարդգես Ստեփանյանի, արձանագրվել էր մեկ հանգամանք, թե ինչու պետք է մեկ ամսով տնային կալանքը երկարաձգվի. ըստ այդմ՝ քանի որ ակտիվ վարութային գործողություններ պետք է կատարվեն նաեւ նախաքննության հանգամանքից ելնելով: Ի դեպ՝ դատախազ Դալլաքյանին հարց է պետք ուղղել՝ ինչո՞ւ այդ դատական ակտը նա չբողոքարկեց, իսկ այսօր միջնորդեց երեք ամսով երկարաձգել տնային կալանքը: Դրա պատասխանը տվել եմ՝ պարոն Դալլաքյանը չի կարող լինել անկողմնակալ դատախազ»:
Կարդացեք նաև
Արփինե ՍԻՄՈՆՅԱՆ
