«2018 թվականի մայիսի 9-ին նույն Նիկոլ Փաշինյանը Արցախում ասաց՝ Արցախը Հայաստան է եւ վե՛րջ. ու ասաց` սիրելի արցախցիներ, Թավշյա հեղափոխությունը ոչ միայն չի սպառնում Արցախի ինքնորոշմանը, այլեւ հեռանկարներ է բացում Արցախի ինքնորոշումը դե յուրե իրականացնելու համար: Այնուհետեւ նա ոչինչ չարեց կամ նաեւ իր գործողություններով նպաստեց, որ Ադրբեջանը հարձակվի Արցախի վրա ու պատերազմի ընթացքում ոչինչ չարեց Արցախն ու ՀՀ սահմանները պաշտպանելու համար»,- այսօր Եռաբլուրում լրագրողների հետ զրույցում Արցախը Ադրբեջանի մաս ճանաչելու նախապատմությունը հիշեց ԱԺ «Հայաստան» խմբակցության պատգամավոր, ՊՆ նախկին նախարար Սեյրան Օհանյանը:
Հիշեցնենք, որ մայիսի 9-ը տարիներ շարունակ Հայաստանում նշվել է որպես Եռատոն՝ Հայրենական մեծ պատերազմում տարած հաղթանակի, Շուշիի ազատագրման եւ Արցախի Պաշտպանության բանակի կազմավորման օր: Այսօր Եռատոնից մնացել է սոսկ Հաղթանակի օրը:
«Ինքն այսօր խոսում է պատերազմի եւ խաղաղության մասին, խոսում է, որ իշխանության են գալու եռագլուխ պատերազմի կուսակցությունը, այն պարագայում, որ ինքն է պատերազմ բերել, ինքն է եռագլուխ պատերազմի կուսակցության անդամ՝ Էրդողանի եւ Ալիեւի հետ միասին: Իրենց առջեւ նպատակ են դրել նսեմացնել հաղթանակները, հերոսներին, որոնք պայքարել են մեր ինքնության համար»:
Օհանյանի խոսքով՝ Փաշինյանը ոչ միայն պարտության, պատերազմի, այլեւ հայ ժողովրդի նսեմացման խորհրդանիշն է. «Այսօր պահն է, որ հայ ժողովուրդը գիտակցի, որ այս իշխանությունների ապիկար եւ Արցախի նկատմամբ դավաճանական կեցվածքի շնորհիվ գնում ենք ողբերգական ճանապարհով: Այդ ճանապարհը պետք է արգելափակվի, այս նսեմացման եւ զրոյին տանելու ընթացքը պետք է կանգնեցվի: Ժողովուրդը պետք է մերժի»:
Կարդացեք նաև
Արփինե ՍԻՄՈՆՅԱՆ
Լուսանկարը՝ արխիվային
