«Մինչև այն պահը, որ ընտրություն կատարելու անհրաժեշտություն չի լինի դե յուրե և դե ֆակտո, մենք նման հարցերի շուրջ հանգիստ, հանդարտ առանց նյարդայնանալու պետք է շարժվենք»,-Երևանում քարոզարշավի շրջանակում լրագրողների հետ ճեպազրույցում ասաց ՀՀ վարչապետ Նիկոլ Փաշինյանը՝ անդրադառնալով ՌԴ-ից ՀՀ-ի հասցեին հնչող այն հայտարարություններին, թե ժամանակն է, որ ՀՀ-ն ընտրություն կատարի:
Նշենք՝ Վլադիմիր Պուտինը հայտարարել էր, որ ճիշտ կլիներ Երևանի վերաբերմունքը իր քաղաքացիների և Ռուսաստանի նկատմամբ՝ որպես տնտեսական գործընկեր, հնարավորինս շուտ կողմնորոշվել ԵՄ-ին անդամակցելու հարցում և դա անել ԵԱՏՄ առաջիկա գագաթնաժողովում. «Եվ իմ կարծիքով՝ ճիշտ կլիներ թե՛ Հայաստանի բնակչության, քաղաքացիների նկատմամբ, թե՛ մեր՝ որպես տնտեսական գլխավոր գործընկերոջ նկատմամբ, հնարավորիս շուտ կողմնորոշվել, օրինակ՝ հանրաքվե անցկացնել: Դա մեր գործը չէ, բայց սկզբունքորեն տրամաբանական կլիներ հանրաքվե անցկացնել և հարցնել Հայաստանի քաղաքացիներին՝ ինչպիսի՞ն կլինի նրանց ընտրությունը: Դրան համապատասխան էլ մենք ևս համապատասխան եզրակացություններ կանեինք և կգնայինք փափուկ, ինտելիգենտ և փոխշահավետ ապահարզանի ճանապարհով»:
Նիկոլ Փաշինյանի արձագանքն էր. «Մինչև այն պահը, երբ ընտրություն կատարելու անհրաժեշտություն չի լինի, մենք նման հարց օրակարգում չենք դնելու: Ես համաձայն չեմ նաև ապահարզան ձևակերպման հետ: Ես Ազգային ժողովում էլ եմ առիթ ունեցել ասելու, որ մենք միջպետական հարաբերությունները երբեմն շփոթում ենք ամուսնության հետ: Հայաստանի Հանրապետությունը միջպետական հարաբերություններում առաջնորդվում է միջպետական տրամաբանությամբ, և մենք ԵԱՏՄ լիարժեք անդամ ենք, այնպես ինչպես մյուս անդամները: Քանի դեռ մենք ԵԱՏՄ անդամ ենք, լիարժեք մասնակցում ենք բոլոր որոշումների կայացմանը: Քանի դեռ անհրաժեշտություն չի առաջացել չենք պատրաստվում էդպիսի հարց դնել, կանենք հանրաքվե, երբ դրա անհրաժեշտությունը լինի»:
Նիկոլ Փաշինյանը վստահեցրեց՝ ՌԴ նախագահի հետ մենք այդ աշխատանքային հարաբերություններ ունեն՝ հիմնված փոխադարձ վստահության վրա․ «Ամենասուր հարցերը քննարկում ենք հանգիստ, հարգալից, բարեկամական մթնոլորտում՝ փաստարկների և փաստերի վրա հիմնվելով։ Ես այդ տրամաբանությունը շարունակելու եմ։ Մենք ՌԴ-ի շահերը վնասելու խնդիր չունենք, չենք ունեցել, բայց մենք լիարժեք նվիրված ենք նաև մեր պետության շահերին։ Մենք ԵՄ-ի հետ մեր հետագա հարաբերությունները խորացնելու ճանապարհով ենք նաև շարժվելու»։
Կարդացեք նաև
Լրագրողների փաստմանը՝ ՌԴ-ից պահանջում են, որ Ուկրաինայի նախագահ Վոլոդիմիր Զելենսկու հայտարարություններին, Նիկոլ Փաշինյանն արձագանքեց․ «Եվրոպական քաղաքական համայնքի գագաթաժողովը հարթակ է, և այդ միջոցառումն ինչքան իմ միջոցառումն է, այնքան էլ մյուս մեր գործընկերներինն է։ Ես չեմ կարծում՝ որպես հյուրընկալող երկրի վարչապետի պետք է գրաքննեմ կամ պետք է պարտադիր ամեն ինչին արձագանքեմ։ Բազմակողմ հարթակում մարդիկ արտահայտվում են։ Եղել է՝ նաև իմ ներկայությամբ ՌԴ նախագահը հայտարարություններ է արել տարբեր երկրների վերաբերյալ, բայց չեմ հիշում, որ ՌԴ-ն ինձնից ակնկալեր, որ ես արձագանքեի այդ հայտարարություններին։
ՀՀ-ն եվրոպական քաղաքական համայնքի, ԵԱՏՄ անդամ երկիր է, ԱՊՀ անդամ երկիր է, բայց դա չի նշանակում՝ մենք հավակնում ենք բոլոր գործերին խառնվել։ Մենք մեր օրակարգերի շրջանակում ենք։ Մենք պիտի՞ ՌԴ-ի ու Ուկրաինայի հարաբերությունները կարգավորենք։ Մենք մեր համեստ դերակատարությունն ունենք, որ նպաստենք համաշխարհային կայունությանն ու խաղաղությանը, բայց մեր մասով»։
Նիկոլ Փաշինյանը վստահեցրեց՝ չեն ներքաշվելու վիճաբանության մեջ․ առանց լրացուցիչ նյարդի, բարեկամության և փոխադարձ հարգանքի մթնոլորտում են հարցերը քննարկելու․ «Եթե գնահատենք, որ մեր՝ որոշում կայացնելու պահը հասունացել է, մենք ուրիշներին չենք սպասի»։
Նիկոլ Փաշինյանի ասուլիսն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
