«Միշտ էլ սովածը կուշտին է ուրիշ աչքով նայել, տնատերն էլ՝ անտունին»,- այսօր Սպիտակում ՔՊ-ի նախընտրական քարոզարշավի ժամանակ Նիկոլ Փաշինյանին ասաց մի կին, որը դժգոհում էր 5 տարի վարձով ապրելուց: Ըստ քաղաքացու՝ բնակիչների համար նոր կառուցված շենքն էլ 5 տարի է՝ կառուցում են ու դեռ չեն հանձնել բնակիչներին:
«Հիշում եք, որ նոր պետք է ընտրվեիք 2021 թվականին, իմ ձեռքը սեղմեցիք, 5 տարի ա քուչեքին ենք, 9 անձ ունեցող ընտանիքս վարձով է, շենքը պատրաստ է, բայց չեն հանձնում ժողովրդին։ Ինձ լսի, էլի վարչապետ ջան, ախր քեզ ընտրել եմ, բա վարչապետը չի՞ ասում էս կնոջ ընտանիքը 5 տարի ա քուչեքն ա, ուր գնում եմ՝ ասում են վարչապետը գիտի, վարչապետը գիտի, չգիտե՞ք։ Պարոն վարչապետ նպաստից կտրված, հիվանդանոցից կտրված, 3 անչափահաս երեխես քուչեքն ա, բա ես ե՞րբ պետք ա իմ տունը մտնեմ, հիվանդ կնիկ եմ։ Կհետաքրքրվեք՝ երբ կլինի»,- ասաց կինը Փաշինյանին։
Ի պատասխան Նիկոլ Փաշինյանն ասաց, որ չի հետաքրքրվի, որովհետև պրոցես է գնում. «Շենքն ավարտելուց հետո պրոցեսներ պետք է դեռ կատարվեն։ Պետությունը մինչև այդ շենքը ավարտված չհամարի, որեւէ մեկին տալու իրավունք չունի, ընթացակարգեր են գնում, գոռալու-ճվալու կարիք չկա»:
Հետո Փաշինյանը զայրացավ. «Պիտի չսարքեին, տիկին»:
Կարդացեք նաև
«Ո՞նց, բա մեր տները քանդել էին, ոնց չսարքեին»,- ասաց դժգոհող կինը:
«Մի ամսվա մեջ կլինի, կստանաք»,- խոստացավ Նիկոլ Փաշինյանը։
Արփինե ՍԻՄՈՆՅԱՆ
Լուսանկարը՝ ՔՊ ֆեյսբուքյան էջից
