«Այսօր երեկոյան Վանաձորում նվագելու եմ վարչաբենդի հետ»,- այսօր Ալավերդիում նախընտրական քարոզարշավի ժամանակ ասաց վարչապետ Նիկոլ Փաշինյանը՝ հրավիրելով ալավերդցիներին Վանաձոր:
Փաշինյանը պատմեց, որ վերջին մեկ տարին ամեն օր հարվածային գործիքներ է նվագել: Ըստ նրա՝ ամեն օր ժամը 4:30 կամ 5:00-ին արթնանում է, նամակագրություններն է թերթում, հետո մի ժամ հարվածային գործիքներ է նվագում ու գնում աշխատանքի. «Գործիք նվագելը լավ է, նաեւ օգնում է՝ կտրվես» :
Փաշինյանը նաեւ պատմեց, որ թմբուկ նվագելուց առաջ վաղ առավոտյան ինքը ուրիշ բանով էր զբաղված. «Ես կարդում էի հայ ժողովրդի պատմությունը՝ գտնելու մի պարզ հարցի պատասխան՝ ինչն է պատճառը, որ մեր պատմությունն ամեն անգամ կրկնվում է, ինչն է պատճառը՝ մենք անընդհատ կորցնում ենք մեր պետությունը, ինչն է պատճառը, որ անընդհատ ենթարկվում ենք ցեղասպանության, կոտորածների: Եվ իմ հետեւությունը մեկն էր՝ մենք բավարար չափով չենք գնահատում մեր պետության արժեքը մեզ համար ու թույլ ենք տալիս, որ ուրիշները մեզ օգտագործեն ուրիշների դեմ»:
Կարդացեք նաև
Փաշինյանը նաեւ խոսեց Անկախության հռչակագրի հայեցակարգի մասին. «1990 թվականի անկախության հռչակագրի ամբողջ հայեցակարգը հետեւյալն է՝ Հայաստանի հանրապետությունը ստեղծում ենք որպես կանգառ ուրիշ տեղ գնալու, ուրիշ հանգրվանի հասնելու համար: Մենք փոխում ենք այդ փիլիսոփայությունը՝ ասելով, որ Հայաստանի հանրապետությունը կանգառ չէ, այլ վերջնական հանգրվան»
Արփինե ՍԻՄՈՆՅԱՆ
Լուսանկարը՝ արխիվային
