Արծաթյա զարդերի արտադրությամբ զբաղվող երգչուհի Սիրուշոն ինստագրամյան իր էջի սթորի բաժնում հայտնում է, թե իրենց ասել են, որ մինչև ամսի 11-ը Pregomesh խանութի վրայից պետք է հանվի մեծ խաչը, հակառակ դեպքում տուգանվելու են:
Երևանի քաղաքապետարանից պնդում են, թե «Պռեգոմեշ» խանութի ցուցափեղկում տեղադրվել է ինքնակամ գովազդ, որը ենթակա է ապամոնտաժման։ Այս մասին «Sputnik Armenia»-ի հետ զրույցում ասել է Երևանի քաղաքապետարանի Գովազդի վարչության պետ Արմեն Առաքելյանը։
Առաքելյանի խոսքով` Երևանում արտաքին գովազդ տեղադրելու չափորոշիչները հստակ են և գոյություն ունի գովազդի տեղադրման թույլտվության ընթացակարգ։
«Այս տնտեսվարողն իր խանութի ֆրիզային հատվածում ունի «Պռեգոմեշ» հայերեն և անգլերեն գրվածքով տեղադրման թույլտվություն, իսկ ցուցափեղկում որևէ արտաքին գովազդի դիմում չենք ստացել, հետևաբար որևէ արտաքին գովազդի տեղադրման թույլտվություն տնտեսվարողը չունի։ Վարչական շրջանի համապատասխան բաժնի աշխատակիցների կողմից տնտեսվարողին տեղեկացվել է խնդրի մասին։ Ինքնակամ տեղադրված գովազդը ապամոնտաժելու համար տրվել է ժամանակ»,–ասել է Առաքելյանը։
