Հայաստանի համար Գերմանիան ոչ միայն Եվրոպական միության առանցքային պետություններից է, այլ հուսալի գործընկեր՝ ժողովրդավարական ինստիտուտների ամրապնդման, իրավունքի գերակայության ապահովման եւ խորհրդարանական կառավարման համակարգի կատարելագործման հարցում: Այս մասին ասել է ՀՀ ԱԺ մարդու իրավունքների պաշտպանության եւ հանրային հարցերի մշտական հանձնաժողովի նախագահի տեղակալ Ռուստամ Բաքոյանը ԳԴՀ Բունդեսթագի անդամ Յոհաննես Ֆոլքմանի գլխավորած պատվիրակության հետ հանդիպման ընթացքում:
Հուլիսի 1-ին կայացած հանդիպմանը մասնակցել են նաեւ հանձնաժողովի անդամներ Էսթեր Այվազյանը եւ Մարինա Ղազարյանը:
Ռուստամ Բաքոյանը նշել է, որ Հայաստանը վերջին տարիներին անցել է բարդ, բայց անշրջելի ճանապարհ՝ ուղղված ժողովրդավարության ամրապնդմանը: Նա հավելել է, որ ամբողջ թիմի համար առաջնահերթություն է օրենսդրական այնպիսի բարեփոխումների իրականացումը, որոնք երաշխավորում են յուրաքանչյուր քաղաքացու հիմնարար ազատությունները:
Որպես Հայաստանի խորհրդարանի ազգային փոքրամասնությունների, մասնավորապես՝ եզդիական համայնքի ներկայացուցիչ՝ նա առանձնահատուկ շեշտել է, որ պետությունը մեծ ջանքեր է գործադրում երկրում ապրող բոլոր էթնիկ եւ կրոնական համայնքների իրավունքների պաշտպանության, մշակութային ինքնության պահպանման ու հանրային-քաղաքական կյանքին նրանց լիարժեք ներգրավման համար:
Կարդացեք նաև
Հանձնաժողովի նախագահի տեղակալը նշել է, որ Գերմանիան ունի ազգային փոքրամասնությունների իրավունքների պաշտպանության հարուստ փորձ ու իրավական մեխանիզմներ: Այս համատեքստում Ռուստամ Բաքոյանը պատրաստակամություն է հայտնել ակտիվորեն համագործակցել եւ փորձի փոխանակում իրականացնել՝ հաշվի առնելով նաեւ Գերմանիայում բնակվող մեծաթիվ եզդիական համայնքի գործոնը, ինչը լրացուցիչ կապող օղակ է երկու երկրների միջեւ: «Մենք պատրաստակամ ենք Գերմանիայի մեր գործընկերների հետ քննարկել հստակ ծրագրեր, որոնք միտված են օրենսդրական դաշտի կատարելագործմանը, խորհրդարանական վերահսկողության մեխանիզմների հզորացմանը եւ քաղաքացիական հասարակության հետ ինստիտուցիոնալ երկխոսության զարգացմանը»,- ասել է հանձնաժողովի նախագահի տեղակալը:
Յոհաննես Ֆոլքմանը շնորհակալություն է հայտնել հյուրընկալության համար՝ նշելով, որ պատվիրակության անդամներին միավորում է Հայաստանի հետ հարաբերությունների կարեւորության գիտակցումն ու ժողովրդավարական բարեփոխումներին նպաստելու պատրաստակամությունը:
Ռուստամ Բաքոյանը պատասխանել է պատվիրակության անդամների հարցերին, ներկայացրել հանձնաժողովի գործունեությունը, խոսել 2026 թվականի խորհրդարանական ընտրությունների մասին:
ԱԺ
