«Հայ-իրանական հարաբերությունների օրակարգային հարցերը պետք է լինեն, ու դրանք են «Թրամփի ուղի» նախագծից ի հայտ եկող ռիսկերի կառավարումն ու հնարավոր մարտահրավերների վերացումը»,- այսօր կայացած ասուլիսում հայտարարեց Հայաստանում Իրանի դեսպան Խալիլ Շիրղոլամին՝ պատասխանելով ԱՄՆ-ի հետ խաղաղության բանակցությունների և այդ ամենում «Թրամփի ուղի» նախագծին վերաբերող հարցերին։
Դեսպանը նկատեց՝ Իրանի շատ լեգիտիմ ու տրամաբանական անհանգստությունն իր սահմանների հարևանությամբ ամերիկացիների ներկայության վերաբերյալ պետք է հստակ արձագանք ստանա, այդ անհանգստություններին պետք է պատասխան տրվի։ Հավելեց՝ Հայաստանի կառավարությունը հավաստիացրել է, որ այս նախագծի իրականացման հետևանքով որևէ մարտահրավեր կամ որևէ սպառնալիք Իրանի համար չի ստեղծվի։
«Թրամփի ուղի» նախագծի շրջանակներում, ըստ դեսպանի, պետք է ձեռք բերել մեխանիզմ, որի շրջանակներում Հայաստանը կկարողանա իրականացնել ապաշրջափակման իր ամբողջ ներուժը՝ միաժամանակ հստակ արձագանքելով «ցանկացած կետում Իրանի դեմ սպառնալիքներին»։
Ինչ վերաբերում է նրան՝ արդյոք Թեհրանում իրատեսական համարում են այս պայմաններում ԱՄՆ-ի հետ որևէ համաձայնության հասնելը, երբ Իսլամաբադում երկու օր հետո կայանալիք բանակցություններից առաջ երեկ կրկին ԱՄՆ-ի կողմից գնդակոծվեցին իրանական որոշ բնակավայրեր, դեսպանն ասաց, որ խաղաղության համաձայնագրի ձեռքբերման և առաջ մղման ճանապարհը բարդ է ու լի է խոչընդոտներով՝ հաշվի առնելով ԱՄՆ-ի և Իսրայելի հարձակումներն ու վայրագությունները Իրանի դեմ։ Սակայն, իր կարծիքով, բանակցություններին նախորդող նմանօրինակ բախումները բանակցություններից առաջ մարտավարական բնույթ ունեն և լայնածավալ պատերազմի մասին չեն հուշում։ Ամեն դեպքում, ԻԻՀ-ն ցույց տվեց, որ դրանք անպատասխան չեն մնալու, և պատրաստ են ցանկացած սցենարի։
Կարդացեք նաև
Մանրամասները՝ տեսանյութում
Ամբողջական տեսանյութը՝ այստեղ
Նելլի ԳՐԻԳՈՐՅԱՆ
