«Միասնության թեւեր» կուսակցության առաջնորդ Արման Թաթոյանը գրում է.
«Ռուբեն Մելիքյանը իրական գիտնական է, մանկավարժ ու հայրենասեր մարդ, քրեական դատավարության լավագույն մասնագետներից:
Պարոն Մելիքյանը Հայաստանի քրեական դատավարությունում վերաքննիչ ու վճռաբեկ վարույթների, Վճռաբեկ դատարանի այսօրվա իրավաբանության, նախադեպային որոշումների համակարգի հիմնադիրներից է:
Նա ԵՊՀ իրավագիտության ֆակուլտետում երկար տարիներ դասավանդվող «Իրավաբանական գիր և վերլուծություն» առարկայի երկու հիմնադիրներից մեկն է: Բազմաթիվ գիտական հոդվածների ու մենագրությունների հեղինակ է:
Կարդացեք նաև
Արցախի մարդու իրավունքների պաշտպանի պաշտոնում առաջին ու միակ Պաշտպանն էր, որ Արցախի անձնագրով (ոչ թե Հայաստանի կապույտ, այլ հենց Արցախի անձնագրով) մուտք գործեց Եվրախորհրդարան և այնտեղ հատուկ ասուլիս տվեց ադրբեջանական հանցանքների մասին:
2016 թ. քառօրյա պատերազմից հետո Թալիշում հատուկ ասուլիսով զեկույց ներկայացրեց, որի հիման վրա նաև Մարդու իրավունքների եվրոպական դատարանը հունիսի 8-ի վճռով հաստատեց ադրբեջանական զինվորականների կողմից Հայկ Թորոյանին գլխատելու, դաժանաբար սպանելու փաստը: Վերջին տարիներին Հայաստանի լավագույն փաստաբաններից է:
Նա այն բացառիկ դասախոսներից է, որ բարձր որակի իրավական գիտելիքներ փոխանցելուց բացի ուսանողներին տալիս է փիլիսոփայական պատկերացումներ իրավունքի մասին, սովորեցնում է, թե ինչպես մեկնաբանել իրավունքը:
Դասավանդում է նաև անգլերեն լեզվով:
Յուրաքանչյուր բուհի համար պատիվ կլինի պարոն Մելիքյան դասախոս ունենալը:
Այս ամենն ինքս եմ տեսել, ինքս եմ ականատես եղել»:
