«Օգոստոսի 2-ին Լոռու մարզում Օձուն գյուղում կկայանա հատուկ կարիքներ ունեցող անձանց «Ճախրուկ» միջազգային ներառական ամենամյա 6-րդ փառատոնը: Այն այս տարի կկայանա Կամերային երաժշտության ազգային կենտրոնի հետ համագործակցությամբ, Երեւանի պետական կամերային երգչախմբի եւ Հնագույն երաժշտության «Տաղարան» համույթի հետ միասին»,- «Արմենպրեսի» մամուլի սրահում նշեց «Ճախրուկ» միջազգային ներառական փառատոնի համահիմնադիր Անահիտ Մխիթարյանը: Փառատոնը կբացվի մասնակից երեխաների ձեռքի աշխատանքների ցուցահանդեսով:
Անահիտ Մխիթարյանը մանրամասնեց, որ փառատոնի անցկացման համար ամեն անգամ ընտրում են Հայաստանի որեւէ մարզ, նպատակը համայնքի ակտիվ ներգրավվածությունն ապահովելն է, հատուկ կարիքներ ունեցող երեխաների միջոցով ազգային մշակույթը ներկայացնելը:
Կարդացեք նաև
«Ճախրուկ» միջազգային ներառական փառատոնի համահիմնադիր Աննա Մխիթարյանն էլ նշեց, որ իրենց փառատոնն ազգային երաժշտության փառատոն է, այս տարի եւս ազգային երաժշտություն է հնչելու՝ Կոմիտաս, օրորոցայիններ, ժողովրդական երգերի մշակումներ: «Մեր ազգային երաժշտությունը ոգեղեն է, շատ յուրահատուկ կապ է ստեղծում հենց հանդիսատեսի ու մասնակիցների հետ, ամբողջ գործընթացն ինքնին դառնում է բուժիչ եւ ոգեշնչող»,- ասաց նա:
Կամերային երաժշտության ազգային կենտրոնի տնօրեն Գարեգին Սարգսյանը նշեց, որ սա Կամերային երաժշտության ազգային կենտրոնի եւ «Ճախրուկ» ՀԿ-ի առաջին համագործակցությունն է, մի քանի ամիս առաջ են հուշագիր կնքել մշակութային համագործակցության մասին: «Սիրով Կամերային երաժշտության ազգային կենտրոնի կառույցի ներքո գործող մեր երկու երաժշտախմբերը կմասնակցեն փառատոնին, այդպիսով ցանկացանք մեր փոքրիկ ներդրումն ունենալ այս նախաձեռնության մեջ: Կարծում եմ՝ գեղեցիկ օր կունենանք օգոստոսի 2-ին, եւ տա Աստված, դա շարունակական լինի»,- ասաց Գարեգին Սարգսյանը:
Նա նաեւ հավելեց, որ Կամերային երաժշտության տան դահլիճում արդեն երեխաների հետ մի քանի փորձ արել են, երաժշտախմբերի հետ նրանք մասնակցում են թե երաժշտական գործիքների նվագակցությամբ, թե երգչախմբի հետ երգեցողությամբ: Կամերային երաժշտության ազգային կենտրոնի տնօրենն ընդգծեց, որ բավականին գեղեցիկ, վառ ծրագիր է սպասվում:
Տեսանյութն ամբողջությամբ
Գոհար ՀԱԿՈԲՅԱՆ
Լուսանկարները՝ Ճախրուկի ՖԲ էջից
