ՔՊ վարչության արտահերթ նիստում այսօր որոշվեց արտաքին հարաբերությունների մշտական հանձնաժողովի նախագահի թեկնածու առաջադրել Սարգիս Խանդանյանին։
Տարածքային կառավարման, տեղական ինքնակառավարման, գյուղատնտեսության և բնապահպանության հարցերի մշտական հանձնաժողովի նախագահի թեկնածու ընտրվեց Վահե Ղալումյանը։
Աշխատանքի և բարեկեցության հարցերի մշտական հանձնաժողովի նախագահի թեկնածու է ընտրվել Նիկոլ Փաշինյանի նախկին խոսնակ Նազելի Բաղդասարյանը։
Կրթության, գիտության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախագահի թեկնածուն Սիսակ Գաբրիելյանն է։
Կարդացեք նաև
Եվրաինտեգրման մշտական հանձնաժողովի նախագահի թեկնածու է ընտրվել Սոնա Ղազարյանը։
Մարդու իրավունքների պաշտպանության և հանրային հարցերի մշտական հանձնաժողովի նախագահի թեկնածուն Զարուհի Բաթոյանն է։
Պաշտպանության և անվտանգության հարցերի մշտական հանձնաժողովի նախագահի թեկնածուն Վիլեն Գաբրիելյանն է, պետաիրավական հարցերի մշտական հանձնաժողովինը՝ Արուսյակ Ջուլհակյանը, տարածաշրջանային և եվրասիական ինտեգրման հարցերի մշտական հանձնաժողովինը՝ Տրդատ Սարգսյանը, տնտեսական հարցերի մշտական հանձնաժողովինը՝ Բաբկեն Թունյանը, իսկ ֆինանսավարկային և բյուջետային հարցերի մշտական հանձնաժողովինը՝ Ծովինար Վարդանյանը։
Նիստից հետո Նիկոլ Փաշինյանն ասաց՝ այս ընտրությունը չի նշանակում, որ նշված անձինք անպայման կընտրվեն հանձնաժողովների նախագահներ. դա կախված է նրանից, թե ընդդիմության ներկայացուցիչները որ հանձնաժողովները կընտրեն։
«Մեր հաշվարկով, ընտրվել է 6 կին և 6 տղամարդ։ Ոչ մի թեկնածու միաձայն չի ընտրվել։ Որոշ դեպքերում անցկացվել է երկրորդ փուլ։ 4-5 դեպքում ձայները բաշխվել են 9։10 հարաբերակցությամբ, և տարբերությունը կազմել է ընդամենը մեկ ձայն»,- ասաց Փաշինյանը։
Արփինե ՍԻՄՈՆՅԱՆ
