2026 թվականի առաջին կիսամյակում Հայաստանում գրանցվել է 6421 արտակարգ դեպք-պատահար՝ նախորդ տարվա նույն ժամանակահատվածի համեմատ դեպքերի թիվը նվազել է 1364-ով կամ 17,5 տոկոսով։ Այս մասին օգոստոսի 21-ին ՆԳ նախարարությունում տեղի ունեցած մամուլի ասուլիսի ընթացքում հայտնել է ՆԳՆ փրկարար ծառայության տնօրեն-ՆԳ նախարարի տեղակալի ժամանակավոր պաշտոնակատար Արամ Ղազարյանը։
«2025 թվականի հաշվետու ժամանակահատվածի համեմատությամբ նվազում է արձանագրվել ոչ միայն արտակարգ դեպքերի և պատահարների թվաքանակում, այլև համապատասխանաբար 6-ով և 352-ով նվազել են զոհերի ու տուժածների թվերը»,- նշել է Արամ Ղազարյանը։
Փրկարարական ստորաբաժանումների իրականացրած աշխատանքների արդյունքում փրկվել է 68 մարդու կյանք։
Հաշվետու ժամանակահատվածում գրանցվել է հրդեհի 2431 դեպք՝ նախորդ տարվա նույն ժամանակահատվածի համեմատ հրդեհների թիվը նվազել է 1392-ով կամ 36,4 տոկոսով։
Կարդացեք նաև
«Հրդեհների դեպքերի նվազումը պայմանավորված է ՆԳՆ փրկարար ծառայության տարածքային ստորաբաժանումների կողմից հրդեհավտանգ ժամանակահատվածում իրականացվող լայնածավալ իրազեկման աշխատանքներով, ինչպես նաև եղանակային պայմաններով»,- նշել է Արամ Ղազարյանը։
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԵՐՔԻՆ ԳՈՐԾԵՐԻ ՆԱԽԱՐԱՐՈՒԹՅՈՒՆ
ՀԱՆՐԱՅԻՆ ՀԱՂՈՐԴԱԿՑՈՒԹՅԱՆ ԵՎ ԻՐԱԶԵԿՄԱՆ ՎԱՐՉՈՒԹՅՈՒՆ
