Այսօր «Ադեկվադ» միաբանության համահիմնադիր Արթուր Դանիելյանի գործով իրավապահները խուզարկություններ են կատարել «Ադեկվադի» նախկին գրասենյակում։
Մարինե Մանուչարյանի լուսանկարը՝ ֆեյսբուքյան էջից
«Շատ զավեշտալի է, որովհետև խուզարկության էին եկել՝ մտածելով, որ եկել են «Ադեկվադի» գրասենյակ, բայց սա վաղուց «Ադեկվադի» գրասենյակը չէ։ Այստեղ արցախցի ընտանիք էր ապրում, մեր իրերը վաղուց տարված էին։ Մեզ համար այն նաև պահեստային տարածքի պես մի բան էր, որտեղ բերել էի հանգուցյալ Ռիչարդ Կիրակոսյանի համակարգիչը, իրերն ու գրքերը, որոնք, հնարավոր է, նվիրաբերեինք Ամերիկյան համալսարանին, բայց դե եկան, փակեցին, տարան»,- լրագրողների հետ զրույցում ասաց «Ադեկվադ» միաբանության անդամ Մարինե Մանուչարյանը։
Նրա խոսքով՝ գրասենյակում Արթուր Դանիելյանի հետ կապ ունեցող ոչինչ չկար. «Ըստ իրենց որոշման՝ եկել էին Արթուրի ֆեյսբուքյան գործունեության հետ կապված ինչ-որ բաներ, ձեռագիր նյութեր, պլաններ երևի փնտրելու»։
Մանուչարյանն ասաց, որ նախաքննության ավարտից հետո ամեն ինչ պարզ կդառնա, և կերևա, թե որքան աբսուրդային գործ է, ինչպես են փորձում լռեցնել Արթուր Դանիելյանին։
Կարդացեք նաև
«Ինչքան մոտենում ենք խաղաղության փաստաթղթի ստորագրմանը, ինչքան մոտենում ենք ՀՀ-ին պաշտպանվելու պոտենցիալ հնարավորություններից զրկելու գործընթացներին, Արթուր Դանիելյանին լռեցնելու փորձերը չեն դադարի»,- հավելեց Մանուչարյանը:
Անդրադառնալով Փաշինյանի՝ այսօր առավոտյան խաղաղության տեսլականի մասին արած հայտարարություններին՝ Մանուչարյանն ասաց, որ Փաշինյանի հայտարարություններն արդեն մի քանի տարի է իրեն հույս չեն ներշնչում Հայաստանի ապագայի վերաբերյալ։
«Լավ գիտեմ՝ ուր է այս ամենը գնում, և, ցավոք, շատ ավելի դժգույն ու մռայլ ժամանակներ են գալու։ Հույս ունեմ՝ մեր հանրությունը եզրահանգումներ կանի ու հնարավորինս շուտ կարթնանա»։
Հիշեցնենք, որ Արթուր Դանիելյանը ֆեյսբուքյան գրառման համար երկու ամսով կալանավորվել է:
Արփինե ՍԻՄՈՆՅԱՆ
