Այսօր Գյումրու ավագանին քաղաքի պատվավոր քաղաքացու կոչմանն արժանացրեց անվանի քանդակագործ, վաստակավոր նկարիչ Սամվել Գարեգինի Պետրոսյանին։
Նկարիչների միությունն էր գրություն ուղարկել քաղաքապետարան՝ նման առաջարկ անելով։
Այս մասին իր ելույթում հայտնեց Գյումրու քաղաքապետարանի աշխատակազմի քարտուղար Կարեն Մալխասյանը։ Նկարիչների միությունը բարձր է գնահատել Սամվել Պետրոսյանի բազմամյա ստեղծագործական գործունեությունն ու նշանակալի ավանդը հայ կերպարվեստի, մասնավորապես քանդակագործության զարգացման գործում՝ առաջարկելով 75-ամյակի առիթով նրան շնորհել Գյումրու պատվավոր քաղաքացի։
Կարեն Մալխասյանը ներկայացրեց նրա ստեղծագործական ժառանգության հետաքրքիր օրինակները՝ դրանք հատ-հատ ցուցադրելով էկրանին։
Կարդացեք նաև
Քանդակագործը, շնորհակալություն հայտնելով, հիշեց Շառլ Ազնավուրի արձանը քանդակելու ընթացքը։
«Երբ քանդակում էի Շառլ Ազնավուրի արձանը, ինքը բնորդ ծառայեց, երբ հարցրեցի՝ ո՞նց է քանդակը, պարոն Ազնավուր, աթոռից իջավ, ասեց՝ հոյակապ է, հարցրեցի՝ ինչո՞ւ է հոյակապ, պատասխանեց՝ որովհետև այսքան երիտասարդ է», -պատմեց քանդակագործը։
Շառլ Ազնավուրի արձանը տեղադրված է Գյումրու Շառլ Ազնավուրի անունը կրող հրապարակում։
Նկատենք նաև, որ Սամվել Պետրոսյանը թեև շատ ու շատ հայտնի գործերի հեղինակ է, սակայն նրա աղմուկ հանած քանդակներից մեկը Մարալիկի կենտրոնական հրապարակում Հայոց Ցեղասպանության 100-ամյակի կապակցությամբ տեղադրված Սողոմոն Թեհլիրյանի արձանն է, որը մի պահ՝ 2022 թվականի հունվարին, հայտնվել էր ապամոնտաժման վտանգի տակ՝ Թուրքիայից հնչող ակնարկների պատճառով։
Քանդակագործն այդ ժամանակ Aravot.am-ին ասել էր․ «Թուրքիան իր չորս նախապայմաններն է առաջ քաշում, բայց մենք պատմական ճշմարտության հետ գործ ունենք, ես կերտել եմ պատմական ճշմարտությունը, սա տարեգրություն է»։
Նունե ԱՐԵՎՇԱՏՅԱՆ
