Վարչապետ. «Ոնց որ սրտով չեք հանում, ոնց որ ցանկանալով չեք հանում»

Վարչապետ. «Ոնց որ սրտով չեք հանում, ոնց որ ցանկանալով չեք հանում»

Կառավարության այսօրվա նիստում վարչապետ Կարեն Կարապետյանը ոստիկանության պետի տեղակալ Վարդան Եղիազարյանից, կարելի է ասել, մի կերպ «պոկեց» վարչական բեռի թեթեւացմանն առնչվող որոշումը, որով հանվում է տույժ ու տուգանքը խախտումների համար եկած ակտերի վրայից, եթե քաղաքացին ուշացնում է եւ ակտի համար չի վճարում:

Վարդան Եղիազարյանը կառավարության հաստատմանը ներկայացրեց Ճանապարհային ոստիկանության համակարգի բարեփոխումների հայեցակարգին հավանություն տալու եւ դրանից բխող միջոցառումների իրականացման ժամանակացույցը հաստատելու մասին նախագիծը:

Ըստ այդմ՝ բարեփոխումներին ուղղված 24 միջոցառում է իրականացվելու ոլորտում: Արդյունքում, ըստ փոխոստիկանապետի, բոլոր ջանքերը միտված են լինելու բնակչությանը մատուցվող ծառայությունների որակի բարձրացմանը, կոռուպցիոն ռիսկերի նվազեցմանը, ճանապարհային պատահարների թվի եւ հետեւանքների նվազեցմանը, վարչական բեռի թեթեւացմանը:

Վարչապետը հետաքրքրվեց՝ մեր քաղաքացիների համար ի՞նչն է փոխվել: «Պարոն վարչապետ, նախ թեթեւացնում ենք վարչական բեռը: Բավական դյուրինացնում ենք էն բոլոր փողոցային երթեւեկության կանոնները, որտեղ դա հնարավոր է իրականացնել, տրանսպորտային հոսքերն ենք ավելի հստակ վերահսկում»,- մեկ առ մեկ թվարկեց ոստիկանության պաշտոնյան:
Կարեն Կարապետյանը հետաքրքրվեց՝ ի՞նչ նկատի ունեն, երբ ասում են, որ վարչական բեռն է թեթեւանալու: «Մասնավորապես, նախկին տուգանքների վրա, երբ 50 տոկոս տույժի ավելացում կար, դա նվազեցվում է երկու անգամ՝ 25 տոկոս է դառնում»,- ասաց պարոն Եղիազարյանը:

Վարչապետը համառորեն հարցրեց. «Նվազեցվում ենք, թե՞ հանում ենք», ինչին ի պատասխան` ոստիկանության պաշտոնյան ոչ մի կերպ չէր ուզում նշել, որ հանելու են:

Վարդան Եղիազարյանը կրկնեց, որ նվազեցնում են: «Մեր քաղաքացիներին դա է հետաքրքրում, որ դուք տուգանքների տույժերը հանում եք»,- ասաց վարչապետը: Պարոն Եղիազարյանը կրկին կրկնեց, որ՝ չեն հանում, նվազեցնում են:

«Հիմա նվազեցնում եք, թե՞ հանում եք»,- կրկին հարցրեց Կարեն Կարապետյանը: Վարդան Եղիազարյանը ստիպված ասաց. «Հա, հանում ենք, պարոն վարչապետ»:
«Ոնց որ սրտով չեք հանում, ոնց որ ցանկանալով չեք հանում: Պարոն Եղիազարյան, ոնց որ ընենց զոռով եք էս բանը բերել»,- ասաց Կարեն Կարապետյանը:

Լուսինե ԲՈՒԴԱՂՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

 
Առցանց Առավոտի լուրերին facebook-ով բաժանորդագրվելու համար սեղմեք