«Միգուցե կային առանձին պատեհապաշտներ, ովքեր այդ ընթացքում կողմնորոշվեցին եւ որոշեցին ընդգրկվել «Երկրապահում»։ Բնականաբար, ես համամիտ չեմ այն որակումներին, թե իբր նոր ընդգրկվածների մեծ մասը «նավից փախչող առնետներ» են։ Եթե ենթադրաբար ընդունենք այդ որակումը, ապա պետք է զարմանալ, թե «Հանրապետություն» միավորմանն ինչպես էր հաջողվել այդքան «առնետներ» հավաքել»։
ԱԼԲԵՐՏ ԲԱԶԵՅԱՆ ԱԺ եւ «Երկրապահ» կամավորականների միության փոխնախագահ, «Իրավունք», թիվ 18
Եղածն, ինչպես ասում են, անցած է։ Ընտրական նոր օրենսգրքում, կարծում ենք, ճիշտ կլինի ներառել մի դրույթ, համաձայն որի՝ թե՛ համամասնական, թե՛ մեծամասնական ցուցակներում կարգելվի առնետներին առաջադրել պատգամավորության թեկնածու։ Չէ՞ որ, ըստ Հանրագիտարանի՝ առնետները «Հայաստանում հանդիպում են ամենուրեք։ Ապրում են բնակավայրերում, ամռանը երբեմն տեղափոխվում են բանջարանոցները։ Բազմանում են տարեկան 4 անգամ» (ՀՍՀ, I հատոր, էջ 546)։ Ի՞նչ մի դժվար էր, ուրեմն, նախորդ ընտրություններում այդքան «առնետներ» հավաքել «Հանրապետությունում»
ՆԱԽԱՐԱՐԻ «ԾՈՎԱՍՏՂԻԿԸ»
Կարդացեք նաև
«Ես նախարար եմ՝ առանց նախարարության»։
ՎԱՀՐԱՄ ԱՎԱՆԵՍՅԱՆ ՀՀ տնտեսական եւ կառուցվածքային բարեփոխումների նախարար, «Ազգ», 2 մայիսի
Վահրամ Ավանեսյանն այս ասելուց հետո երգում է. «Ախ ը՛նկե՜լ ե՜մ քա՜ր ու քա՜րա՜փ, Իմ էո՜ւթյո՜ւն, ե՜տ ա՜րի՜, ե՜տ, Ես ծո՜վակ ե՜մ ա՞ռա՛նց նա՜վա՜կ, Իմ էո՜ւթյո՜ւն, ե՜տ ա՜րի, ե՜տ, Ես ա՜նտա՞ռ ե՜մ ա՜ռա՜նց եղնի՜կ, Իմ վեհո՛ւթյո՜ւն, ե՜տ ա՜րի, ե՜տ»։ Ու շարունակում. «Ախ դա՛րձե՜լ ե՜մ ե՜ս նա՜խա՜րա՜ր, Իմ էո՜ւթյո՜ւն, ե՜տ ա՜րի՜, ե՜տ, Նախա՛րա՜ր ե՜մ ա՜ռա՜նց տա՞րա՜ծք, Իմ էո՜ւթյո՜ւն, ե՜տ ա՜րի՜, ե՜տ, Արհե՛ստա՜վա՜րժ, բա՜րե՜փո՞խի՜չ, Իմ վեհո՛ւթյո՜ւն, ե՜տ ա՜րի, ե՜տ»։
ՎԱՍԱԿ ԴԱՐԲԻՆՅԱՆ