Ինչպես արդեն հաղորդվել էր, օրերս Ախալքալաքի շրջանի տարածքում վրաց-ռուսական համատեղ զորավարժություններ անցկացնելու նպատակով դեպի Ջավախք շարժվող զինվորական ստորաբաժանումների ճանապարհը փակել էին «հայազգի գրոհայինները»՝ ստիպելով հրետանային բրիգադին հետ քաշվել, իսկ նույն օրը տեղի վարչակազմի շենքում պայթյուն էր տեղի ունեցել եւ անհայտ անձանց կողմից թալանվել ռուսական զինապահեստը։
Ջավախքում իրավիճակի անսպասելի լարվածությունը դեռ չի լիցքաթափվել, թեեւ, առավել լավատեսների բնորոշմամբ, վատթարացում չի արձանագրվել։
Հայաստանի պաշտոնական աղբյուրները շարունակում են լրատվություն հաղորդել՝ գերազանցապես վկայակոչելով վրացական ծառայություններն ու լրատվամիջոցները, կարծես թե Թբիլիսիում չկա Հայաստանի դեսպանատուն եւ վերջինիս բուն խնդիրներից մեկն էլ դեպքերի մասին ճշմարտացի տեղեկատվության ապահովումը չէ։ Զանազան իրարամերժ պատմություններին գումարվել է եւս մեկը, ըստ որի Ջավախքում իբրեւ թե կատարվել են հայազգի քաղաքացիների ձերբակալություններ։ Վրաց գեներալներն անմիջապես հերքել են այդ լուրերը՝ պնդելով, որ իրենք նման քայլերի չեն դիմել։ Երկրի կառավարությունն իր հերթին ստեղծել է հատուկ հանձնաժողով պատահարի մանրամասները քննելու համար։
Թե հայկական եւ թե վրացական առանձին գործիչներ վերստին ակնարկում են, որ կատարվածը սադրանքի հետեւանք է՝ երկու երկրների հարաբերություններում սեպ խրելու նպատակով։ Սցենարի հեղինակի հասցեն չի նշվում։ Հայաստանի դեսպանատնից ստացվող թղթակցությունների բովանդակությունը գաղտնի է պահվում՝ պատճառաբանությամբ, որ դրանք ծառայողական են եւ նախատեսված չեն հրապարակման։ Միեւնույն ժամանակ բոլոր կարգի տեղեկություններում շրջանցվում է ոչ անկարեւոր այն հանգամանքը, որ այս օրերին Թբիլիսիում է գտնվում ՀՀ ԱԳ նախարար Վ. Օսկանյանը։
Կարդացեք նաև
Վերջինս հանդիպումներ է ունենալու Վրաստանի նախագահի, նոր վարչապետի, ԱԳ նախարարի, այլ պաշտոնյաների հետ։ Հասկանալի է, որ այդ զրույցներում չէին շրջանցվելու ջավախքահայության հիմնահարցերը։ Իսկ բանակցությունների բովանդակություններում որոշակի «շտկումների» համար հրահրված միջադեպերը միանգամայն բավարար էին։
Հ. ՉԱՐԽՉՅԱՆ
