Նախընտրական ամբողջ շրջանում թեկնածուները խոսում էին դրանք ազատ եւ արդար անցկացնելու մասին։ Դա հիմնականում հաջողվեց, քանի որ մի քանի քվեաթերթիկ միանգամից քվեատուփ լցնելու, ընտրատարածք ընտրողներ բերելու խախտումներից բացի, այլ լուրջ խափանումներ չարձանագրվեցին։
Ընտրությունների ողջ ընթացքում քվեատուփ չգողացվեց, հոսանք չանջատվեց, արձանագրություններ չկեղծվեցին։ Այսպիսի լոկալ բնույթի ընտրություններում այլեւս կարիք չկա դիմել բացահայտ կեղծիքների։ Թեկնածուների բազմաքանակությունը ընտրարշավում եւ ընտրություններում ներգրավված մարդկանց բազմաքանակությունը հնարավորինս քիչ տեղ էր թողել կեղծիքների։
23476 ընտրողներից ընտրություններին մասնակցեց մոտ 50%-ը կամ 11802 մարդ։ Ինչպես եւ նախատեսում էին բոլորը, ընտրությունները մեկ փուլով չավարտվեցին։ Առավել շատ ձայներ ստացան քաղաքապետի պաշտոնակատար, Հանրապետական կուսակցության մարզային կառույցի ղեկավար Հարություն Մխոյանը՝ 3499 ձայն եւ «Երկրապահ» կամավորականների միության Արմավիրի տարածքի ղեկավար Ռուստամ Գասպարյանը՝ 2379 ձայն։ Շատերի համար խիստ զարմանալի էր, որ երրորդ տեղում հայտնվեց Հանրապետական կուսակցությունից եւ «Երկրապահ» միությունից հեռացված Հայկ Ղանդիլյանը՝ 1169 ձայն, իրենից ցած թողնելով ՀԺԿ-ի, Կոմկուսի, Դաշնակցության ներկայացուցիչներին, որոնց համար աշխատում էր սեփական կուսակցությունների ողջ համակարգը։
Ընտրությունների արդյունքները, ըստ տեղամասերի, ցույց տվեցին, որ ընտրողները քվեարկում են ոչ թե ըստ ինչ-որ քաղաքական հայացքների կամ նախընտրական ծրագրերի, այլ ըստ թաղային պատկանելության, անձնական ծանոթության, կամ ինչ-որ մեկի խնդրանքով։ Այսպես առաջին տեղում հայտնված Հարություն Մխոյանն իր թաղամասում գտնվող երկու ընտրատարածքներից ստացել էր մոտ հազար քվե ավել, քան Ռուստամ Գասպարյանը։ Հենց այս երկու ընտրատեղամասերը ապահովեցին պրն Մխոյանի՝ առաջինը լինելը։ Մյուս ընտրատարածքներում արդյունքները համարյա մոտ էին իրար։ ՀԺԿ ներկայացուցիչ Սամվել Երիցյանը (Ղժան Սամո), իր բնակության վայրի երկու ընտրատեղամասերում հաղթել էր բոլոր թեկնածուներին, իսկ մյուս տարածքներում, չնայած Կարեն Սերոբիչի նկատմամբ ունեցած ջերմ սիրուն, ստացել էր աննշան քվեներ։ Իսկ Կոմկուսի ներկայացուցիչ, Արմավիրի փոխքաղաքապետ Պավլիկ Հարությունյանը ստացել էր ընդամենը 313 ձայն, որը նշանակում է, որ նրա օգտին չեն քվեարկել նույնիսկ կոմունիստների ընտանիքի անդամները։
Կարդացեք նաև
Համայնքային ընտրական հանձնաժողովն ընտրությունների երկրորդ փուլը նշանակեց ապրիլի 11-ին։ Այս անգամ շատ ավելի լուրջ պայքար է սպասվում։
ԱՎԵՏԻՍ ԲԱԲԱՋԱՆՅԱՆ
