Երեկ քաղաքապետարանում խորհրդակցության թեման, ինչպես ներկայացրեց քաղաքապետ Ռ. Նազարյանը՝ մայրաքաղաքի գազիֆիկացման խնդիրն էր, որը պետք է իրականացվի «Հայռուսգազարդ» ձեռնարկության հետ։ Խորհրդակցությանը ներկա էին նաեւ Երեւանի թաղապետերը եւ այլ պաշտոնական անձինք։ Հիմնականում խոսվեց այն մասին, որ քաղաքը գազիֆիկացվելու է փուլ առ փուլ։
Առաջիկայում կապույտ վառելանյութ կստանան մայրաքաղաքի հինգհարկանի շենքերը։ Գոհացնող արդյունքի դեպքում հերթը կհասնի իննհարկանիներին, որից հետո գազիֆիկացման ծրագիրը ձեռք կբերի համատարած բնույթ։ Իհարկե, այս ամենն այն դեպքում, երբ բնակիչը համաձայնության գրավոր հայտ ներկայացնի տվյալ շրջանի համապատասխան մարմնին՝ կանխիկ վճարելով 40 հազար դրամ։
Թաղապետերից ոմանք, հաշվի առնելով բնակչության անվճարունակությունը, հարց ուղղեցին՝ արդյոք հնարավո՞ր չէ սակագինը կամ իջեցնել, կամ հնարավորություն տալ բնակչին՝ գումարը վճարել տարվա ընթացքում։ Սակայն «Հայռուսգազարդի» տնօրեն Ռոլանդ Ադոնցը նշեց, որ դա անհնար է, քանի որ իրենք ունեն ահռելի ծախսեր, գազի ամբողջ համակարգը մոտավորապես 20 տարվա կյանք ունի եւ խիստ վերանորոգման կարիք կա, իսկ որոշ թաղամասերում նախատեսվում է փոխել ողջ համակարգը՝ համաձայն նոր նախագծերի։
Քաղաքապետ Ռ. Նազարյանը շեշտեց, որ այդ 40 հազար դրամը բնակիչը ջուրը չի գցում, այլ դրանով փակվելու է նրա օգտագործած գազի գումարը։
Կարդացեք նաև
ՆՈՆԱ ՄՈՎՍԻՍՅԱՆ
