ԹԱՆԿ ՆՎԵՐ Հայկ եւ Ալիս Ասատուրյանները, որոնց նվիրաբերած նկարների ցուցահանդեսը բացվեց երեկ՝ Ազգային պատկերասրահում, արդեն չկան, բայց վառ է նրանց հիշատակը։ Իրենց հավաքածուի մյուս կեսը Ասատուրյանները նվիրել էին Մայր Աթոռ սբ. Էջմիածնին։ Այն, հավանաբար, կցուցադրվի մեկ ամիս հետո Էջմիածնում։ Ազգային պատկերասրահի տնօրեն Շահեն Խաչատրյանը պատմում էր, որ 60-ականներից սկսած Ասատուրյանները իրենց դստեր՝ Սեդայի հետ, երկու տարին մեկ գալիս էին Հայաստան։ Ծագումով Պարսկաստանից ամերիկյան այդ ընտանիքը ոգեշնչված էր հայրենիքով եւ ոչինչ չէր խնայում հայ նկարիչների գործերը ձեռք բերելու համար։ Հավաքածուի մեջ տեղ են գտել Սարյանի, Մինասի, Հարություն Կալենցի, Ժանսեմի, Գառզուի ստեղծագործություններից։ Ամերիկյան հայտնի քանդակագործ Ռուբեն Նաթյանի աշխատանքներից կար մի գծանկար, որն, ըստ Խաչատրյանի, մեծ ձեռքբերում է մեր պատկերասրահի համար, որովհետեւ Նաթյանը Արշիլ Գորկու նման մեծություն է, եւ նրա գործերից մեր պատկերասրահը ոչինչ չուներ։ ՆԵԼԼԻ ԲԱՐՍԵՂՅԱՆ
