«ԵԹԵ ԲԱՐԵՀԱՃԵՆ ԿԱՐԴԱԼ» Երեկ տեղի ունեցավ «Սեդ Մարսեդ» խորհրդատվական ընկերության թողարկած «Ներդրումները Հայաստանում. տնտեսական աճի գրավական» գրքի շնորհանդեսը։ «Գիրքը ներդրումային բնագավառների ոլորտում մեր կատարած վերլուծությունների արդյունքների ամփոփումն է։ Մենք փորձել ենք վերլուծել, թե 10 տարիների ընթացքում ինչ է կատարվել ներդրումային շուկայում եւ գրքում փնտրվում են ուղիներ, թե ինչպես անել, որ ներդրումները ծառայեն Հայաստանի տնտեսական աճին»,- ասաց «Սեդ Մարսեդ» ընկերության գործադիր տնօրեն Տիգրան Ջրբաշյանը։ Գրքում քննարկվել են ներդրումների եւ Հայաստանի տնտեսական քաղաքականության տարբեր ուղղությունների եւ արդյունքների կապերը։ Առանձնակի տեղ է հատկացվել համաշխարհային փորձի, ներդրումների վերաբերյալ տնտեսագիտական տեսությունների ուսումնասիրությանը։ Ընդգծվել են ռազմավարության բացակայությամբ պայմանավորված հիմնախնդիրները եւ դրանց ազդեցությունը ներդրումային քաղաքականության վրա, ինչպես նաեւ ներկայացվել են ռազմավարական եւ մարզավարական նշանակության մի շարք առաջարկություններ։ Պրն Ջրբաշյանը հույս հայտնեց, որ գիրքը, որն անվճար կտարածվի պետական ատյանների, բիզնեսմենների եւ բանկերի շրջանում, որեւէ ազդեցություն կթողնի, «եթե, իհարկե, բարեհաճեն կարդալ»։ Ա. ԴԱԲԱՂՅԱՆ
