ՌԵԿՏՈՐԻՆ ԱՌԱՋԱՐԿՎԵԼ Է ՄՏԱԾԵԼ Դեռեւս տարեսկզբին ՀՀ գլխավոր դատախազությունը քրեական գործ էր հարուցել Խ. Աբովյանի անվան մանկավարժական համալսարանի հասարակագիտական մասնագիտությունների ֆակուլտետի գործունեության օրինախախտումների առնչությամբ։ Վերջերս նաեւ ֆինանսների եւ էկոնոմիկայի նախարարության Վերահսկողության վարչությունն է խախտումներ արձանագրել բուհի ֆինանսատնտեսական գործունեության մեջ եւ, այս առնչությամբ եւս, ըստ մեր տեղեկությունների, քրեական գործ է հարուցվել։ Կրթության եւ գիտության նախարարության կոլեգիայի վերջին նիստի ժամանակ քննարկվել են ֆիննախի Վերահսկողության վարչության այդ ստուգման արդյունքները։ Հաշվի առնելով, որ բուհում նման օրինախախտումներ են արձանագրվում, մանկավարժական համալսարանի վարկն անընդհատ ընկնում է, ինչը նաեւ ոչ ճիշտ ղեկավարման արդյունք է, ԿԳ փոխնախարար Արա Ավետիսյանը կոլեգիայի նիստի ժամանակ նույնիսկ առաջարկել է բուհի ռեկտորին, որ մտածի այդ պաշտոնում իր աշխատանքը շարունակելու նպատակահարմարության մասին։ Ռեկտոր Միսակ Դավթյանն առայժմ չի արձագանքել այս առաջարկին։ Ն. Հ. Իրավախախտումների մասին՝ վաղվա համարում:
