ՅԱՆ ՊՈՈՒԼՍԵՆ. «ԹՈՒՐՔԵՐՆ ԱՎԵԼԻ ՃՆՇՎԱԾ ԵՆ ԼԻՆԵԼՈՒ»

Երեկ Հայաստանի ֆուտբոլի ֆեդերացիան լրագրողներին ազգային հավաքականի թեկնածուների հետ «Հրազդան» ստադիոնում

մարզումներից առաջ հանդիպելու հնարավորություն էր ընձեռել, որին հաջորդեց գլխավոր մարզիչ Յան Պոուլսենի ասուլիսը:

«Մենք աշխատում ենք այս խաղին հնարավորին չափ լավ նախապատրաստվել,- ասաց Յան Պոուլսենը:- Որպես գլխավոր մարզիչ, իմ խնդիրը թիմում լավ մթնոլորտ ստեղծելն է, կազմակերպչական եւ տակտիկական խնդիրներ լուծելը: Այս պահի դրությամբ լավ վիճակում ենք, տրամադրված ենք խաղալու եւ կաշխատենք անել հնարավորինը: Մենք իրատեսորեն ենք նայում խաղին, գիտենք, թե ով է մեր մրցակիցը: Թեեւ Թուրքիան ՖԻՖԱ-ի դասակարգման աղյուսակում 10-րդն է, մենք՝ 98-րդը, այդուհանդերձ, այս պահին Թուրքիայի հավաքականը հոգեբանորեն ավելի ճնշված վիճակում է: Տեսականորեն նրանք պետք է հեշտությամբ հաղթեն: Բայց մենք աշխատելու ենք անակնկալ մատուցել, ցույց տալ, որ կարող ենք ուժեղների դեմ լավ խաղալ: Ու դրան պատրաստ ենք:

Դատելով Եվրոպայի առաջնությունում Թուրքիայի խաղերից, ֆավորիտը նրանք են: Եվ եթե ուզում են պայքարել խմբում բարձր տեղի համար, պետք է ձգտեն անպայման հաջողության հասնել: Եվ դա էլ հոգեբանորեն ճնշելու է նրանց: Ես հասկանում եմ, որ այս խաղի հետ կապված զգացմունքներն ավելի մեծ են: Բայց նաեւ համոզված եմ, որ մեր տղաները հանդիպմանը վերաբերվում են այնպես, ինչպես խաղացել են Լեհաստանի, Պորտուգալիայի հավաքականների հետ, այսինքն՝ գիտեն, թե ինչպես պետք է խաղալ:

Ես անչափ կարեւորում եմ 12-րդ խաղացողի՝ ֆուտբոլասերի դերը: Համոզված եմ, որ նրանք այդ օրը կաջակցեն մեր տղաներին, իսկ մրցակից ֆուտբոլիստների հանդեպ քաղաքակիրթ կլինեն»:

Յան Պոուլսենը դիմեց նաեւ լրագրողներին: «Ձեր դերը շատ կարեւոր է: Հայաստանում ֆուտբոլը վերջին տարիներին վերելք է ապրել: Բայց հաճախ սպասելիքներն ավելի մեծ են լինում, քան հնարավորությունները: Լրագրողները պետք է իրատես լինեն եւ մարզասերներին էլ այդ հարցում օգնեն: Պետք է հասկանանք, թե ում դեմ ենք խաղալու. ՖԻՖԱ-ի դասակարգմամբ 10-րդ տեղը զբաղեցնող Թուրքիայի, այնուհետեւ՝ ցուցակը գլխավորող Իսպանիայի: Մեր ֆուտբոլիստներին շատ դժվար աշխատանք է սպասվում: Բայց, միեւնույն ժամանակ, ընդգծում եմ, որ մենք չենք վախենում եւ խաղադաշտ մտնելով՝ ամեն բան անելու ենք լավ արդյունքի հասնելու համար»,- եզրափակեց գլխավոր մարզիչը: