Էքս-Բիթլները՝ Նյու Յորքում
Լեգենդար Beatles խմբի նախկին անդամներ Փոլ Մաքարտնին եւ Ռինգո Սթարը ապրիլի 4-ին բարեգործական համերգով հանդես կգան Նյու Յորքում, տեղեկանում ենք BBC.com-ից: Մաքարտնին այդ օրը կդառնա կինոռեժիսոր Դեվիդ Լինչի հիմնադրամի կազմակերպած երեկոյի աստղերից մեկը: David Lynch Foundation-ի աշխատակիցները հայտարարել էին, որ Մաքարտնին եւ Սթարը տառացիորեն միաժամանակ կհայտնվեն բեմում, ավելի ուշ նրանք հերքել էին դա: Մաքարտնիի մամուլի քարտուղարն էլ ԶԼՄ-ներին տեղեկացրել էր, որ իր «շեֆի» եւ Սթարի համատեղ ելույթի հարցը դեռ քննարկման փուլում է: Սթարի ներկայացուցիչն էլ իր հերթին հայտարարել է, թե Սթարը մի քանի սոլո համարներով է հանդես գալու:
Հավելենք, որ վերջին անգամ Փոլ Մաքարտնին եւ Ռինգո Սթարը համատեղ հանդես են եկել 7 տարի առաջ, այդ համերգն էլ նվիրված է եղել իրենց ընկերոջ՝ Beatles-ի անդամ Ջորջ Հարիսոնի հիշատակին:
Մահացել է Չարլի Չապլինի որդին
Լեգենդար դերասան Չարլի Չապլինի որդին՝ Սիդնեյ Չապլինը, 81 տարեկան հասակում մահացել է Կալիֆոռնիայում գտնվող իր «Միրաժ» ռանչոյում: Այդ մասին հաղորդում է MIG news.com-ը:
www.tert.am-ը նշում է, որ Չապլինների ընտանիքի բարեկամ Ջերի Բոդին հայտնել է, որ Չապլին-կրտսերը վերջերս սրտի կաթված է ունեցել:
Սիդնեյ Էրլ Չապլինը ծնվել է 1926թ. մարտի 31-ին՝ Լոս Անջելեսում: Նա Չարլի Չապլինի երկրորդ որդին էր երկրորդ կնոջից՝ Լիտա Գրեյից: Իսկ անդրանիկ որդին՝ Չարլզ Չապլին-կրտսերը, մահացել է 1968թ.՝ 43 տարեկան հասակում: