«Հայաստան-Թուրքիա երկխոսությունը և հարաբերությունների վերջնական ու ամբողջական կարգավորման պատրաստակամությունը շատ բարձր մակարդակի վրա է»,- խորհրդարանում լրագրողների հետ ճեպազրույցում ասաց արտաքին գործերի և միջազգային առևտրի նախարար Արարատ Միրզոյանը։
«Սա այն է, ինչ մենք գիտենք Հայաստանի կողմից, սա այն է, ինչ մենք տեսնում ու լսում ենք թուրքական կողմից։ Եկեք մեզ էլ նայենք՝ մենք 5 տարի առաջ այս հարցի առումով շատ զգուշավոր էինք, նկատի ունեմ հանրությունը։ Թուրքիայի հանրությունը՝ ևս։ Հիմա, որ համեմատենք, իրավիճակը շատ-շատ է փոխվել։ Ես իրոք տեսնում եմ այդ հավանականությունը՝ հասարակությունների կողմից էլ, իշխանությունների կողմից էլ»,- ասաց նա։
Միրզոյանը նշեց, որ կան գործոններ, որոնք պայմանավորված են այլ երկրներով, այդ թվում՝ նաև Ադրբեջանով, դա գաղտնիք չէ։
«Օրինակ՝ նույն Թուրքիայի իշխանությունները հաճախ հրապարակային ասել են, որ իրենք կարգավորումները տեսնում են սինխրոն։ Հիմա Ադրբեջանի հետ մենք ունենք նախաստորագրված և գործող խաղաղություն։ Ադրբեջանի հետ ունենք ապրանքների տեղափոխման տարանցիկ հնարավորություն, Ադրբեջանի հետ ունենք երկկողմ առևտուր։ Թուրքիայի հետ էլ ունենք ահագին առաջընթաց։ Այս գործընթացը շատ դինամիկ ու դրական զարգանում է, և ակնհայտ է ու տրամաբանական, որ ինչ-որ փուլում վերջնական հանգուցալուծում կստանա»,- ասաց Միրզոյանը։
Կարդացեք նաև
Նա նշեց, որ Հայաստանի և Ադրբեջանի ԱԳ նախարարների մակարդակով փոխայցերի վերաբերյալ առարկայական պայմանավորվածություններ չկան:
«Երբ կլինեն բնականոն հարաբերություններ, կարգավորման նոր էտապների հասած կլինենք, խաղաղությունն ավելի ամրապնդված կլինի, բնականաբար, այդ օրն էլ կգա, որ արտգործնախարարությունների ներկայացուցիչները և ղեկավարները կայցելեն իրար և կմասնակցեն կոնկրետ միջոցառումների։ Կոնկրետ պայմանավորվածություն այս պահին չկա»,- նշեց նա։
Ռոզա ՀՈՎՀԱՆՆԻՍՅԱՆ
Լուսանկարը՝ ՔՊ ֆեյսբուքյան էջից. հրապարակվել է 2015 թվականի ապրիլի 24-ին
