«Ամեն ինչ պետք է սկսվի այդ հարցի պատասխանից՝ այդ 64 միլիարդ դրամի չարաշահումը եղե՞լ է, թե՝ ոչ։ Եթե ՀՀ իրավապահ մարմինները գնացել են նման քայլի՝ իմանալով, որ լինելու են նման շահարկումներ, նշանակում է առնվազն որոշակի ծանրակշիռ հիմք ունեն այս իրավական գործընթացը սկսելու համար»,- հարցին՝ ինչպե՞ս կմեկնաբանեք այն, որ երեկ ՀՀ քննչական կոմիտեն խուզարկություններ է իրականացրել Սամվել Կարապետյանի, Նարեկ Կարապետյանի բնակարաններում, որի արդյունքում Սամվել Կարապետյանի և ևս 35 անձի նկատմամբ հանրային քրեական հետապնդում է հարուցվել, Սամվել Կարապետյանը կալանավորվել է և այն փաստին, որ ընդդիմությունը սա մեկնաբանում է որպես քաղաքական հետապնդում, մամուլի ասուլիսի ժամանակ այսպես պատասխանեց ՀՀ վարչապետ Նիկոլ Փաշինյանը։
Ըստ նրա՝ երբ կոնկրետ դեպք է ասվում, թալանը քողարկվում է, ինչ-որ տերմիններ են հնչում․ «Ադրբեջան, Ալիև, Թուրքիա․ մենք այդ միտումը տեսնում ենք։ Այսինքն՝ եթե 64 միլիարդի չարաշահումը եղել է, ուրեմն՝ ի՞նչ, ՀՀ իրավապահ համակարգը ի՞նչ պտի անի, պտի գործի, և դա ժողովրդի պահանջն ու պայմանն է։ 64 միլիարդ չարաշահում է, ի՞նչ կապ ունի Ալիևը։ Կապ ունի ուրիշ բան, որ մենք այսպես կոչված մեր բարերարների ծագումնաբանությունը պետք է հասկանանք։ Իհարկե, դատական գործընթաց կլինի և իրավական գնահատականներ կլինեն։ Մենք պետք է 64 միլիարդ դրամի չարաշահումը և բաժանվող պայուսակները դնենք կշեռքի նժարներին։ Մինչև վերջ գնալու ենք, հասկանանք բարերարության ծագումնաբանությունը։ Դա շատ լավ առիթ է, որ այդ ըմբռնումը տեղի ունենա»։
Փաստմանը՝ Բրյուսելում հայտարարեցիք, որ ԵՄ-ին անդամակցության պաշտոնական հայտ ներկայացնելը կարող է իրատեսական լինել 2027-2028-ին և նաև նշեցիք, որ և′ ԵՄ-ին, և′ ԵԱՏՄ-ին միաժամանակյա լիարժեք անդամակցությունն անհնար է և հարցին՝ արդյոք սա նշանակո՞ւմ է, որ ՀՀ-ն գործնականում սկսել է ԵԱՏՄ-ից դուրս գալու քաղաքական նախապատրաստությունը, Նիկոլ Փաշինյանը պատասխանեց․ «Ոչ, չի նշանակում, որ նախապատրաստություն ենք սկսել։ Մենք չենք պատրաստվում դուրս գալ ԵԱՏՄ-ից, բայց գիտեք նաև, որ ԵԱՏՄ գործընկերները բարձրացնում են այդ հարցը՝ կողմնորոշվելու և հանրաքվե անցկացնելու։ Ես ասել եմ, որ այս պահին հանրաքվեի առարկա գոյություն չունի, որ մենք կարողանանք հանրաքվե անցկացնել։ Պրոցեսը տանում է դեպի դա, որ ի վերջո 2027-2028-ին պաշտոնապես դիմենք ԵՄ լիարժեք անդամ դառնալու գործընթաց սկսելու հարցով՝ մանավանդ, որ մենք ունենք գործող օրենք»։
Կարդացեք նաև
Նիկոլ Փաշինյանի ասուլիսն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
