Ֆրանսիան կոչ է անում սահմանափակել ընդլայնումը
Եվրոպական գործերով Ֆրանսիայի պետքարտուղար Բրյունո լե Մերը կարծիք է հայտնել, որ Արեւմտյան Բալկանյան երկրների՝ ԵՄ ընդունելուց հետո պետք է կանգ առնել եւ կենտրոնանալ ինստիտուտների ամրապնդման գործի վրա: Ինչպես հաղորդում է ՌԻԱ- Նովոստին, այսօրվա դրությամբ ԵՄ անդամ թեկնածուի պաշտոնական կարգավիճակ ունեն Խորվաթիան, որը կարող է անդամակցել այդ կազմակերպությանը 2010 կամ 2011 թվականներին, ինչպես նաեւ Թուրքիան, որի ընդունմանը դեմ են ԵՄ ազդեցիկ երկրները, այդ թվում՝ Ֆրանսիան ու Գերմանիան:
Փորձագետների կարծիքով, ԵՄ-Թուրքիա բանակցությունները կարող են ձգվել 10-15 տարի: Այս տարվա փետրվարին թեկնածու դառնալու հայտ է ներկայացրել Չեռնոգորիան, որի ճակատագիրը, սակայն, առայժմ պարզ չէ: Ալբանիան իր հերթին այս ամսվա ընթացքում նույնպես պատրաստվում է նման հայտ ներկայացնել: Նախատեսվում է, որ նման քայլեր կձեռնարկեն նաեւ Սերբիան ու Բոսնիա-Հերցեգովինան: Տեսականորեն եվրոպական հեռանկարներ ունի նաեւ Կոսովոն, սակայն վերջինիս անկախությունը հրաժարվում են ճանաչել ԵՄ անդամ Ռումինիան, Սլովակիան, Հունաստանը, Կիպրոսը եւ Իսպանիան:
