Միացյալ Արաբական Էմիրություններում ընթացող շախմատի շեյխ Ռաշիդ Բին Համդան ալ Մահդումի մրցանակների ավանդական՝ 11-րդ խաղարկությունում, որը կրում է «Dubai Open» անունը, հայաստանցի գրոսմայստեր Տիգրան Քոթանջյանը գերազանց մեկնարկ է վերցրել:
29 երկրների ազգային ֆեդերացիաների շուրջ 140 մասնակիցների (34-ը կրում է գրոսմայստերի կոչում) պայքարում նա խաղացված չորս տուրերում տարել է միայն հաղթանակներ եւ միանձնյա գլխավորում է մրցաշարային աղյուսակը:
«Dubai Open»-ում մեր հանրապետությունը ներկայացնում են եւս հինգ շախմատիստներ: Նրանցից Սուրեն Պողոսյանը եւ գրոսմայստերներ Հրանտ Մելքումյանն ու Աշոտ Անաստասյանը 3,0-ական միավորով ընթանում էին, համապատասխանաբար, 13-րդ, 22-րդ եւ 27-րդ հորիզոնականներում, Աղասի Ինանցը 2,0 միավորով 81-րդն էր, իսկ Վարդան Խոջայանը՝ 91-րդը (1,5 միավոր):
Երեկ հինգերորդ տուրի օրն էր: