Այն բանից հետո, երբ ղարաբաղյան հակամարտության կողմերը հիմնարար սկզբունքներում համաձայնության կգան, կսկսվի ինտենսիվ գործընթացը, որը կտեւի մի քանի ամիս եւ կբերի խաղաղության համաձայնության:
Այս մասին երեկ, «Եվրոֆորում-Հայաստան» կոնֆերանսի ժամանակ հայտարարեց ԵԱՀԿ Մինսկի խմբի ամերիկացի համանախագահ Մեթյու Բրայզան:
Նա նշեց, որ բանակցությունների գործընթացում 2004 թվականից արձանագրվել էր էական առաջընթաց, որը ընդհանուր կոնցեպցիաների հարթություններից տեղափոխվեց խաղաղության համաձայնության կոնկրետ շրջանակների դաշտ: Նա նշեց, որ երկու երկրների նախագահներն էլ պատրաստ են բազային սկզբունքները համաձայնեցնելուն:
Նա ընդգծեց, որ համաձայնության միակ ճանապարհը խաղաղ բանակցությունները շարունակելն է: «Ռազմական գործողությունների սպառնալիքները տվյալ պահին ոչ մի օգուտ չեն տա: Պարտված կողմը չի ների պարտությունը, եւ իրավիճակը կսկսի զարգանալ շրջանաձեւ: Դրա համար էլ, հակամարտության խաղաղ կարգավորմանն այլընտրանքներ չկան»: