ՀՀ ԱՐԴԱՐԱԴԱՏՈՒԹՅԱՆ ՆԱԽԱՐԱՐԻ ՀՐԱՄԱՆՈՎ
Արամ Խաչատրյանը ազատվել է «Արթիկ» քրեակատարողական հիմնարկի պետի պաշտոնից եւ փոխադրման կարգով նշանակվել է «Էրեբունի» քրեակատարողական հիմնարկի պետ:
Իսկ Վարդան Սարգսյանը ազատվելով «Արթիկ» քրեակատարողական հիմնարկի պետի տեղակալի պաշտոնից՝ փոխադրման կարգով նշանակվել է նույն հիմնարկի պետ:
ԶՈՐԱՎԱՐԺՈՒԹՅՈՒՆՆԵՐԻ ՇՈՒՐՋ
Հայաստանի պաշտպանության նախարարությունում կտրականապես հերքել են ադրբեջանական ԶԼՄ-ների այն հաղորդումները, թե ՀՀ զինված ուժերն ինչ-որ զորավարժություն են անցկացնում Աղդամի շրջանում: «Հայաստանի զինված ուժերը ոչ մի զորավարժություն չեն անցկացնում ոչ ԼՂՀ տարածքում, ոչ էլ ԼՂՀ շուրջ անվտանգության գոտու տարածքում»,- ըստ «Արմինֆոյի» հաղորդել է ՀՀ պաշտպանության նախարարի մամուլի քարտուղար, գնդապետ Սեյրան Շահսուվարյանը, ավելացնելով, որ նշված շրջաններում զորավարժություններ է անցկացնում բացառապես ԼՂՀ պաշտպանության բանակը:
ԳՐՔԵՐ՝ ԿԱԼԱՆԱՎԱՅՐԵՐԻՆ
Երեկ ԱՆ ՔԿՀ մամուլի քարտուղար Արսեն Բաբայանը «Առավոտին» տեղեկացրեց, որ Երեւանի բնակչուհի Շուշանիկ Պետրոսյանը օրերս հանդես է եկել նախաձեռնությամբ: Նա լսելով, որ քրեակատարողական հիմնարկներում դատապարտյալների մոտ առկա է գրականության նկատմամբ մեծ հետաքրքրություն, իր անձնական գրադարանի մի մասը (շուրջ 250 կտոր), որտեղ գերակշռում են դասականների ստեղծագործությունները, նվիրել է ԱՆ քրեակատարողական ծառայությանը՝ հարստացնելով գրադարանային ֆոնդը: