Նախօրեին Լեհաստանի խորհրդարանը բանաձեւ է ընդունել, որով դատապարտել է 1939թ. սեպտեմբերի 17-ին սովետական բանակի զինված ներխուժումը լեհական տարածք: ՌԴ Պետդումայում արդեն հայտարարել են, թե լեհերը փորձում են վարկաբեկել Ռուսաստանը եւ խեղաթյուրել պատմությունը: Նրանք հակված են այդ դեպքերը գնահատել որպես Կարմիր բանակի «ազատագրական առաքելություն»: ՌԴ արտգործնախարարությունը հայտարարել է, թե բանաձեւը լրջորեն կվնասի Մոսկվայի եւ Վարշավայի միջեւ հարաբերությունների զարգացմանը: «Կարելի է միայն ափսոսանք հայտնել, որ Լեհաստանի բարձրագույն օրենսդիր մարմինը, շոշափելով բավականին նուրբ թեմա, որը առնչվում է ոչ միայն լեհերի եւ ռուսների, այլեւ ուկրաինացիների եւ բելառուսների զգացմունքներին, այն մեկնաբանում է տենդենցիոզ եւ քաղաքականցված մոտեցմամբ»,- հայտարարել է ՌԴ ԱԳՆ-ն:
