![\"\"](\"https://www.aravot.am/2009/aravot_arm/November/5/p14.jpg\")
Իսրայելի եւ Թուրքիայի առանց այդ էլ վատթարացած հարաբերություններին սպառնում են լարվածության նոր դրսեւորումներ: Իսրայելի ռազմական հետախուզության ղեկավար Ամոս Յադլինը (նկարում) հայտարարել է, թե ահաբեկչական «Հզբոլլահ» կազմակերպությունը զենք, այդ թվում՝ հեռահար հրթիռներ է ստանում Իրանից՝ Թուրքիայի տարածքով: «News.am»-ը, վկայակոչելով իսրայելյան ISRA գործակալությանը, փոխանցում է, թե Յադլինը դրանում մեղադրել է նաեւ Թուրքիայի վարչապետ Ռեջեփ Թայիբ Էրդողանին. «Էրդողանը չի կարող այդ մասին չիմանալ: Այդ մարդը երկերեսանի է: Մեղադրելով Իսրայելին անմեղ մարդկանց սպանության մեջ, Էրդողանը լռում է թուրքական ավիացիայի կողմից քրդական գյուղերի ոչնչացման մասին»:
Ավելի վաղ նա նաեւ հայտարարել էր, թե պաղեստինյան «Համաս» շարժումը հաջողությամբ փորձարկել է Գազայի հատվածից մինչեւ Թել-Ավիվ հասնելու ընդունակ հրթիռներ: Գեներալ-մայորը կարծիք էր հայտնել, թե այդ հրթիռները իրանական ծագում ունեն: «Համասը» ո՛չ հերքել, ո՛չ էլ հաստատել էր այդ տեղեկությունը՝ շեշտելով, որ Իսրայելը նման տեղեկություններ տարածելու պատճառներ ունի:
