Մարդկային երեւակայությունը սահման չունի: Այդ թվում նաեւ՝ սպորտում: Ավանդական մարզաձեւերից հագեցած՝ մարդ արարածն աշխարհի տարբեր անկյուններում նորերն է ստեղծում, սակայն պահպանելով արդեն եղածների կանոնների որոշ տարրեր:
Հետիո՞տնը, թե՞ նժույգը
Ո՞վ է ավելի արագ: Այս խնդրի շուրջ 1980 թվականին թեժ բանավեճ ծավալվեց Ուելսում: Եվ Գորդան Գրին անունով մի մարդ առաջարկեց դա ստուգել գործնականում: Եվ այդ ժամանակվանից նրա հարազատ քաղաքում՝ Լյանթիդ-Վելշում ամեն տարի կազմակերպվում են ձիու (հեծյալի) եւ մարդու միջեւ վազքի մրցումներ, որում մասնակիցները պետք է հաղթահարեն 35 կմ: Պարգեւատրման մրցանակային գումարը 25 հազար ֆունտ է, որը նախատեսված է միայն հետիոտնի համար, եթե նա հաղթի: Առաջին մրցանակակրին հարկ է եղել սպասել գրեթե քառորդ դար: 2004-ին Հուվ Լոբբ անունով մի վազորդ երկու րոպեի առավելությամբ հաղթեց լավագույն նժույգներից մեկին:
Ցեխաֆուտբոլ կամ ճահճաֆուտբոլ
Այն ժամանակին հորինել է ֆինն դահուկորդ Էսա Ռոմպայնենը, որը դիմացկունությունը բարձրացնելու նպատակով հաճախ էր մարզվում ճահիճներում: Եվ որպեսզի ավելի հետաքրքիր դառնան այդ ձանձրալի մարզումները, մարզիկը մտածեց ճահճում ֆուտբոլ կազմակերպել: Այս նախաձեռնությունը հետագայում այնքան դուր եկավ մարդկանց եւ այնքան մեծ տարածում ձեռք բերեց, որ 1989 թվականից անգամ աշխարհի առաջնություններ են անցկացվում: Ճահճաֆուտբոլ խաղում են երկու թիմեր (յուրաքանչյուրում 5-ական դաշտի խաղացող եւ 1-ական դարպասապահ): Երկու խաղակեսից յուրաքանչյուրը տեւում է 13 րոպե, իսկ տուգանային հարվածներն իրացվում են ձեռքով:
Ստորջրյա հոկեյ
Անգլիան ոչ միայն ֆուտբոլի ու ռեգբիի հայրենիքն է: Այստեղ է հայտնագործվել նաեւ ստորջրյա հոկեյը: 1954 թվականին մի քանի սուզորդներ, մարզումներն ավելի բազմազան դարձնելու նպատակով, փորձեցին ջրի տակ հոկեյ խաղալ: Ու ստացվեց: Այս խաղում օգտագործվում են 30-35 սմ երկարությամբ պլաստիկե մականներ, իսկ նույնպես պլաստիկով պատված արճճե տափօղակը կշռում է 1,3-1,5 կգ: Մնացած կանոնները նույնն են, ինչ սովորական հոկեյինը, բացառությամբ այն բանի, որ մարզիկները օդ շնչելու համար ստիպված են 13-15 վայրկյանը մեկ գլուխը հանել ջրից:
Բջջային հեռախոսի նետում
Եթե ինչ-որ մեկը զանգել է ձեր բջջային հեռախոսի համարով եւ տհաճ նորություն ասել՝ այդ պահին ցանկանո՞ւմ եք սարքը նետել: Շնորհավորում ենք: Կարող եք մեկնել Ֆինլանդիա եւ մասնակցել բջջային հեռախոսների նետման աշխարհի առաջնությանը: Եվ եթե հաղթեք, կազմակերպիչները ձեզ որպես մրցանակ նորը կնվիրեն: Պատկերացրեք, որ աշխարհի ռեկորդներ էլ են գրանցվել. 53,52 մետր՝ կանանց եւ 94,97 մետր՝ տղամարդկանց: