Պայքար տան պատերի կամ առավելագույն օգուտի համար

Գերմիջին քաշային կարգում աշխարհի վեց ուժեղագույն բռնցքամարտիկների «Super Six Boxing Classic» մրցաշարի նախնական փուլն ավարտվում է, ու վերջին մենամարտերը մասնակիցների համար ճակատագրական նշանակություն կարող են ունենալ: Դրա համար էլ բռնցքամարտիկները եւ նրանց թիմերը ջանում են անել ամեն բան՝ մարտերը սեփական հարկի տակ անցկացնելու, իսկ եթե չստացվի, ստեղծված իրավիճակից առավելագույն օգուտ քաղելու համար:

WBC վարկածով աշխարհի նախկին չեմպիոն Կարլ Ֆրոչը, որ ապրիլի 24-ին գոտին զիջեց Միկել Կեսլերին, հայտարարել է, թե կլքի «Super Six»-ը, եթե մրցաշարի նախնական փուլի վերջին մենամարտն Արթուր Աբրահամի հետ Անգլիայից տեղափոխվի Գերմանիա:

Բրիտանական «The Daily Mail»-ը տեղեկացնում է, թե բռնցքամարտիկների պրոումոթերները նախնական պայմանավորվածություն են ունեցել, որ Աբրահամի եւ Ֆրոչի միջեւ օգոստոսին նշանակված մարտն անցկացվի Նոթինգհեմում: Սակայն Աբրահամը հետագայում հույս է հայտնել, թե այն կարող է տեղափոխվել Բեռլին: Ֆրոչը սկզբում դրան կտրականապես դեմ էր. «Մենք «Showtime» ալիքի ներկայացուցիչ Քեն Հերշմանի հետ արդեն պայմանավորվել ենք, որ նախնական փուլի առաջին եւ վերջին մենամարտերը ես անցկացնելու եմ տանը: Դրա համար էլ այդ մարտը կամ կկայանա Անգլիայում, կամ ընդհանրապես չի կայանա»:

Սակայն օրերս լրատվամիջոցներում տեղեկատվություն տարածվեց, թե Ֆրոչը, կարծես, մտափոխվել է եւ Բեռլինում հանդես գալու համար Աբրահամից պահանջում է $ 1 մլն: «Առնվազն այդքան կպահանջվի, որպեսզի համաձայնեմ Բեռլին մեկնել: Դա այն գումարն է, որ «Showtime»-ն ինձ խոստացել է կիսաեզրափակիչ մտնելու դեպքում: Իսկ Աբրահամին նրա երկրում միավորներով հաղթել ինձ դժվար թե հաջողվի»,- հայտարարել է Կարլ Ֆրոչը: