BBC-ի մատուցմամբ, լույս հինգշաբթի գիշերը անհայտ անձինք ականանետից գնդակոծել են Աբխազիայի Գուդաուտիի շրջանի Լիխնի գյուղում գտնվող Աբխազիայի փոխնախագահ Ալեքսանդր Անկվաբի (նկաում) առանձնատունը: Պետպաշտոնյան վիրավորվել է՝ վնասվածքներ ստանալով ձեռքի եւ ոտքի շրջանում: Անկվաբը հրաժարվել է հիվանդանոց տեղափոխվել: Աբխազիայի նախագահ Սերգեյ Բագապշի ասելով, փոխնախագահի դեմ մահափորձը «հանրապետությունում իրավիճակն ապակայունացնելու փորձ է»: Ինքը՝ Անկվաբը, «Ինտերֆաքսին» ասել է, թե իր ստացած վնասվածքները «միջին» ծանրության են:
Հիշեցնենք, որ սա Աբխազիայի փոխնախագահի դեմ իրականացված առաջին մահափորձը չէ: 2005թ. մարտ եւ ապրիլ ամիսներին նրա մեքենան գնդակոծվել էր ինքնաձիգերից: Երկրորդ մահափորձից հետո Անկվաբի «ջիփի» վրա հայտնաբերվել էր փամփուշտի 17 անցք, բայց փոխնախագահը չէր տուժել. ոտքից վիրավորվել էր միայն նրան ուղեկցող մեքենայի վարորդը: 2007-ի հուլիսին նրա ծառայողական մեքենան գնդակոծվել էր ականանետի արկից, Անկվաբը մի քանի բեկորային վնասվածքներ էր ստացել: Հիշյալ մահափորձերից որեւէ մեկը, սակայն, մինչ օրս էլ չի բացահայտվել: Հայտնի չեն նաեւ դրանց շարժառիթները: Անկվաբը Աբխազիայի փոխնախագահ է նշանակվել այս տարի:
