«Այդ օրինագծում նման «սողանք» թույլ տալ՝ նշանակում է «ղումար» խաղալ կենսաթոշակային գումարների հետ»,- երեկ ԱԺ սոցիալական հարցերի հանձնաժողովի նախագահ Հակոբ Հակոբյանի հետ բանավեճի ժամանակ նման հայտարարություն է արել տնտեսագետ Թաթուլ Մանասերյանը՝ անդրադառնալով կենսաթոշակային բարեփոխումների նախագծին: Նա հատկապես խոցելի է համարել օրինագծի այն դրույթը, համաձայն որի՝ կուտակված կենսաթոշակի գումարները տրամադրվելու են ինչ-որ մասնավոր ներդրումային կազմակերպության, սակայն այդ ընկերությունների սնանկացման դեպքում ՀՀ կառավարությունը պատասխանատվություն չի կրում: Ի պատասխան տնտեսագետի մտահոգության՝ Հ. Հակոբյանը նշեց, որ կուտակային կենսաթոշակային համակարգին անցնելու մեխանիզմը դեռ մշակման փուլում է, օրինագիծը դեռ վերանայվելու է, որի արդյունքում կլինեն փոփոխություններ: Բացի այդ, պարոն Հակոբյանն ասաց, որ կառավարությունը պարտավոր է ինդեքսավորել կենսաթոշակները՝ կենսապահովման բյուջեին համապատասխան:
