17 կինեմատոգրաֆիստներ շնորհակալական նամակ են հղել ԱԺ նախագահ Հովիկ Աբրահամյանին. «Անկախության առաջին տարիներից ի վեր մեր կինոարտադրությունն ունեցավ բազմաթիվ դժվարություններ: Եղան նույնիսկ այնպիսի ժամանակներ, երբ տարեկան մեկ լիամետրաժ ֆիլմ էլ չէր արտադրվում: Դրա արդյունքում մենք ունեցանք այնպիսի կորուստներ, որոնց վերականգնումը երկար տարիների ջանք ու եռանդ է պահանջում: Ճգնաժամային տարիների վատ հետեւանքներից ամենաակնհայտը կինոյում առկա մի շարք մասնագիտությունների իսպառ վերացումը եղավ: Այսօր մեզ մոտ ակնհայտ կարիք է զգացվում դաշտային հնչյունային օպերատորի, երկրորդ ռեժիսորի, ֆոկուս կարգավորողի եւ այլն… Հարգելի պրն Աբրահամյան, Վահե Հակոբյանը, որն այսօր ծառայում է ԼՂՀ ՊԲ լրատվության եւ քարոզչության բաժնում, որպես օպերատոր, հենց այդ բացառիկ մասնագետներից է: Մենք՝ մի խումբ կինոգործիչներս, հայտնում ենք մեր խորին շնորհակալությունը մի զինվորով կինոյին աջակցելու համար»,- ասվում է նամակում, որի տակ ստորագրել են Վահագն Տեր- Հակոբյանը, Անահիտ Աղաջանյանը, Նարինե Մալյանը, Հարություն Խաչատրյանը, Ռուբեն Քոչարը, Միքայել եւ Արմեն Դովլաթյանները, Արամ Շահբազյանը եւ այլք:
