Հնարավոր է՝ պարզվի, որ Ռուսաստանը պատրաստ չէ արժութային այն պատերազմներին, որոնք հիմա վարում են Առեւտրի համաշխարհային կազմակերպության մասնակից երկրները: News.ru-ի փոխանցմամբ, նման կարծիք են հայտնել «Կալիտա-ֆինանսի» վերլուծաբանները՝ մեկնաբանելով արժույթի շուկայում տեղի ունեցող վերջին զարգացումները:
Հոկտեմբերի 31-ի առավոտյան Ճապոնիայի ֆինանսների նախարարությունը մասշտաբային ինտերվենցիա է իրականացրել, որն ուղղված է ազգային արժույթի թուլացմանը: Ըստ որոշ աղբյուրների՝ ինտերվենցիայի ընդհանուր ծավալը կարող է գերազանցել 4 տրիլիոն իենը: Արդյունքում դոլար/իեն հարաբերությունները ընդամենը 25 րոպեի ընթացքում 4,5 տոկոսի թռիչք են գրանցել՝ հասնելով ԱՄՆ մեկ դոլարի դիմաց 75,60- 79,20 իենի: Վերլուծաբաններն արձանագրել են, որ սա այս տարվա մարտից ի վեր ամենամասշտաբային ինտերվենցիան է, որը տեղի է ունենում աշխարհում մակրոէկոնոմիկայի կտրուկ վատթարացման ֆոնին: Նրանց գնահատմամբ, այսօրինակ ինտերվենցիաները ոչ այլ ինչ են, քան «արժութային պատերազմներ», որոնք իրականացվում են տարբեր երկրների կողմից՝ ազգային արժույթի փոխանակման հարաբերականորեն ցածր մակարդակ ապահովելու եւ ներքին արտադրողին աջակցելու համար:
Փոխանակման կուրսի մանիպուլյացիաներն արտացոլում են համաշխարհային տնտեսության գլոբալ ռիսկերը, նաեւ ԱՀԿ-ի գլխավոր սկզբունքի՝ «ազատ մրցակցություն» հասկացության աղավաղված լինելու հանգամանքը:
Այս ֆոնին վերլուծաբանները կարծում են, որ ԱՀԿ-ին Ռուսաստանի անդամակցության գովազդը, որն արվում է վերջին շրջանում, առանձնապես այդ երկրին որեւէ արդյունք չի տա. «Երկիրը փորձում է միանալ կազմակերպությանը դեռ 1990-ականներից, բայց այդ ընթացքում առաջատար երկրների տնտեսական եւ ֆինանսական քաղաքականությունը փոխվել է. նրանք մրցակցում են արդեն ոչ թե գնային եւ մաքսային արգելքների, այլ արժութային կուրսերի մանիպուլյացիայի մակարդակով: Ռուսաստանը սրան պատրաստ չէ»:
Կարդացեք նաև
