Ադրբեջանի նախագահ Իլհամ Ալիեւը հայտարարել է, որ «Հայաստանը խորին անհանգստություն եւ շփոթություն է ապրում Ադրբեջանի ռազմական հնարավորությունների կապակցությամբ»:
Ինչպես հաղորդում է Մեդիամաքսը` վկայակոչելով Տրենդը, Իլհամ Ալիեւն ասել է այս մասին` հանդես գալով Ադրբեջանի նախարարների խորհրդի նիստում:
«Մեր ունեցած տեղեկությունների համաձայն, Հայաստանը մեծ անհանգստություն եւ շփոթություն է ապրում Ադրբեջանի ռազմական հնարավորությունների կապակցությամբ: Մենք ստանում ենք այս տեղեկությունները տարբեր աղբյուրներից, եւ նրանք ոչ մի հնարավորություն չունեն դիմակայելու մեր հզորությանը: ՄԱԿ-ի Անվտանգության խորհրդի ընտրություններին նրանք փախան մարտադաշտից: Ձեզ հայտնի է, որ ժամանակին Հայաստանը նույնպես թեկնածու էր: Այնուհետեւ նրանք լուռ մի կողմ քաշվեցին, քանի որ գիտեին, որ չեն կարողանա պայքարել Ադրբեջանի դեմ: Նույն կերպ մենք բազմիցս ականատես ենք եղել, թե ինչպես են նրանք փախել իրական ռազմադաշտից»,- նշել է Ադրբեջանի նախագահը:
Նրա խոսքերով, կա հակամարտության կարգավորման երկու ուղի` բանակցային եւ ռազմական:
Կարդացեք նաև
«Մենք նույնպես չենք ուզում պատերազմ: Ո՞վ է ուզում պատերազմ: Առավել եւս` ադրբեջանական պետությունը, որը հասել է այսպիսի մեծ հաջողությունների: Բայց դա չի նշանակում, որ բանակցային գործընթացը դրվելու է մի կողմ, եւ բոլոր ջանքերն ուղղվելու են պատերազմ չսկսելուն: Նման բան չի լինի: Մենք ավելի վաղ հայտարարել էինք, որ սկզբունքորեն համաձայն ենք 2009-ին կողմերին ներկայացված առաջարկներին: Այդ սկզբունքներն առաջ են քաշել համանախագահները, այլ ոչ թե մենք: Եթե այս սկզբունքները դեռ ուժի մեջ են, ապա հակամարտությունը կարելի է կարգավորել: Ուզում եմ եւս մեկ անգամ նշել հիմնական պահերը: Կասկածի տակ չի դրվում Ադրբեջանի տարածքային ամբողջականությունը, Ադրբեջանի քաղաքացիները վերադառնում են գրավված բոլոր տարածքներ եւ ապագայում՝ անորոշ ժամանակ եւ անորոշ ձեւով կներկայացվեն առաջարկներ Լեռնային Ղարաբաղի վերաբերյալ: Առանց Ադրբեջանի համաձայնության Լեռնային Ղարաբաղին չի կարող շնորհվել որեւէ կարգավիճակ: Եվ, բնականաբար, ադրբեջանական պետությունը եւ ժողովուրդն երբեք չեն կարող եւ չեն համաձայնվի որեւէ կարգավիճակ տալ Լեռնային Ղարաբաղին Ադրբեջանի կազմից դուրս: Սա են սկզբունքները: Մենք պատրաստ ենք շարունակել բանակցություններն այս սկզբունքների հիման վրա, եւ եթե հակառակ կողմը նմանատիպ քայլեր նախաձեռնի, ապա խնդիրը լուծում կստանա շատ մոտ ժամանակում: Դրա հետ մեկտեղ, եւ դա գաղտնիք չէ, մենք ուժեղացնում ենք մեր ռազմական հզորությունը»,- ասել է Իլհամ Ալիեւը:
Նա հայտարարել է, որ 2012-ին Ադրբեջանը ռազմական ծախսերին կուղղի $ 3մլրդ 474 մլն:
«Մենք ունենք տարածաշրջանի ամենաուժեղ բանակը, ձեռք ենք բերում ամենաժամանակակից սպառազինությունները, տեխնիկան, մարտական ինքնաթիռներ եւ ուղղաթիռներ, հրթիռներ, հրետանի` ամեն ինչը դժվար է թվարկել: Աճում է Ադրբեջանում թողարկվող ռազմական արտադրանքի քանակը եւ տեսականին: Մենք արտադրում ենք շուրջ 600 տեսակ ռազմական արտադրանք: Այսինքն` այսօր ադրբեջանական բանակը մեծ ուժ է, որը մենք կարող ենք օգտագործել եւ կօգտագործենք անհրաժեշտության դեպքում»,- հայտարարել է Իլհամ Ալիեւը: