Թե ինչ բառերով է հայհոյում Ազարենկոն` թողնում ենք ընթերցողների երեւակայությանը:
Իսկ Շարապովան իր ձայնով կարող է խլացնել թենիսի սիրահարներին:
Թենիսի Ավստրալիայի բաց առաջնությունում կանանց գլխավոր մրցանակը վիճարկելու են Մարիա Շարապովան եւ Վիկտորիա Ազարենկոն:
Բացի սուր պայքարի ականատես լինելու գայթակղությունից, նրանց մրցակցությանը ներկա գտնվել պատրաստվող մարզասերները ստիպված են լինելու զինվել խլացուցիչ ականջակալներով: Մարիան կորտում գնդակին ամեն մի հարվածելիս այնքան ուժեղ է ճչում, որ խլանալ կարելի է: Նրա ձայնի հզորությունը հասնում է 105 դեցիբելի: Համեմատության համար ասենք, որ «Ֆորմուլա 1»-ի մեքենայի շարժչի ձայնը 125 դբ է:
Եզրափակչում Շարապովայի դեմ ելնելու է Վիկտորիա Ազարենկոն: Ճիշտ է, նա ձայնով ( ընդամենը 95 դբ) զիջում է Շարապովային, սակայն կորտում նրան հակադրելու է իր հայհոյանքները, որոնք մրցակիցներից շատերի համար են պարտության պատճառ դարձել: Այնպես որ, երկու գեղեցկուհիների անձնական մրցավեճում վճռորոշ դեր խաղալու է ոչ այնքան վարպետությունը, որքան նյարդերի ամրությունը:
Աշոտ ՀԱԿՈԲՅԱՆ
