Այսօր Aravot.am-ի հետ զրույցում, անդրադառնալով «Հայկական ժամանակ» օրաթերթի պատասխանատու խմբագիր Հայկ Գևորգյանի ձերբակալմանը, այսպես արտահատվեց ԳԱԼԱ հեռաստաընկերության քաղաքական մեկնաբան Դերենիկ Մալխասյանը: «Եթե մեր իշխանությունները այս տեմպով ու ոգևորությամբ շարունակեն գործ սարքել լրագրողների գլխին, ու որպես քաղաքական գործիք օգտագործեն ոստիկանությանը` կուսակցություններին, ժուռնալիստներին, մնացած -մնացածին հետապնդելու համար, ապա Հայաստանը կգնա Ադրբեջանի ճանապարհով, որը վարպետ երկիր է լրագրող ձերբակալելու առումով »,- ասում է մեր զրուցակիցը:
Ըստ նրա, ոստիկանների գործելաոճը խեղկատակություն է: «Եթե Հայկ Գևորգյանը հետախուզման մեջ գտնվելով հանդերձ, գնում է նախարարի մոտ մամուլի ասուլիսի, ոստիկանների հետ նկարվում է, նման նկար տեսա Facebook-ում, սա խոսում է Վովա Գասպարյանի խայտառակ ոստիկանություն ունենալու մասին:Վովա Գասպարյանն այսպիսի հայտարարություն անելուց հետո՝ ճիշտ կաներ հրաժարական տար, որովհետև, եթե հավատանք նրա ասածին, որ Հայկ Գևորգյանը հանցագործ է, նշանակում է` ոստիկանությունն այնքան տեղում չէ, որ հանցագործները կառավարության մեջ են ման գալիս: Հպարտանա՞նք, թե՞ լաց լինենք ոստիկանության համար, որ թույլ է տալիս հանցագործներին նախարարի հետ հարցազրույց անել, բարձրագույն պետական օղակների հետ հարաբերություններ ունենալ` հետախուզման մեջ լինելով հանդերձ»:
Մեր զրուցակիցը ոստիկանապետին խորհուրդ է տալիս սցենարը փոխել, քանի որ, ըստ նրա, այն չափազանց պրիմիտիվ է , և կարելի էր ավելի լուրջ բան մտածել: Դերենիկ Մալխասյանը նաև կարծում է, որ արդեն շատ ուշ է լրագրողներին այս ձևով վախեցնելու համար: «Եթե լրագրողները ուզեցին վախենալ, կվախենան, եթե չուզեցին` տաս հատ Գասպարյան Վովա լինի իր հրեշտակներով, ոչինչ չի հաջողվի»,– ասում է Դերենիկ Մալխասյանը:
«Հայկական ժամանակ» օրաթերթի Շիրակի մարզի թղթակից Հերմինե Մկրտչյանի կարծիքով էլ՝ լրագրողների նկատմամբ նման հալածանքներն ու ճնշումները սպասելի են ընտրություններից առաջ: Որպես օրինակ նա մատնանշում է չորս տարի շարունակ հալածանքների ենթարկված ԳԱԼԱ հեռուստաընկերությունը, որտեղ համատեղության կարգով աշխատում է նաև Հերմինե Մկրտչյանը ու սեփական կաշվի վրա է զգացել , թե ինչ է նշանակում հալածված լրագրող լինելը: Ըստ նրա, եթե Հայկ Գևորգյանի խափանման միջոցը չփոխվի ու մեղադրանքները շարունակվեն, ապա ինքը ոտքի կհանի նաև շիրակցի լրագրողներին:
Կարդացեք նաև
Նունե ԱՐԵՎՇԱՏՅԱՆ
