երեք գործարարներ, որոնք քաղաքականության մեջ են
Վերջին շրջանում խոսվում է Սաշիկ Սարգսյանի` քաղաքական դաշտից դուրս գալու մասին: Այսօր Aravot.am-ը «Ազատ դեմոկրատներ» կուսակցության ղեկավար Խաչատուր Քոքոբելյանից հետաքրքրվեց` Սաշիկ Սարգսյանը քաղաքական դաշտում անելիք ունի՞, թե՞ չէ. «Ես գտնում եմ, որ բիզնեսմենները պետք է զբաղվեն բիզնեսով եւ գտնում եմ, որ ցանկացած քաղաքական ուժ ինքն է որոշում, թե իր կողմից ով հանդես գա, ով` ոչ: Դա բացառապես Հանրապետական կուսակցության լիազորությունների մեջ է, իսկ հասարակությունն իր դիրքորոշումը կհայտնի եւ ես` որպես քաղաքական ուժ: Բայց դա բացառապես ՀՀԿ–ի որոշելիքն է»:
Մեր հարցին` ձեր ցուցակում գործարարներ կլինե՞ն եւ կա՞ն խոշոր գործարարներ, որ ուզում են ձեր ցուցակում տեղ գտնել, բայց թույլ չեք տալիս` նա պատասխանեց. «Գործարարների մասնակցությունը ԱԺ–ում, իհարկե, ոչ ձեր նշածը, նորմալ գործարարներից շատ–շատերի մասնակցությունը վնաս չի առանձնապես: Եթե ինքը քաղաքականության մեջ կա, զբաղվում է քաղաքականությամբ` լավ կլինի: Հայաստանի քաղաքական համակարգի չկայացվածության պատճառով է, որ գործարարներն ուզում են գնալ Ազգային ժողով, լավ օրից չէ, որովհետեւ Հայաստանում ոչ մի քաղաքական ուժ դժբախտաբար մինչեւ այսօր գործարարների շահերը հավուր պատշաճի չի պաշտպանել: Եթե այդ խնդիրները վերանան` վստահ եմ, որ գործարարներին ստիպելով չես կարող ԱԺ մտցնել, որովհետեւ իրենց այնտեղ հաճելի չի լինի»:
Նշենք, որ պրն Քոքոբելյանն ինքն էլ «Արթիկ-Տուֆ»-ի բաժնետերերից մեկն է:
Հռիփսիմե ՋԵԲԵՋՅԱՆ
