Տավուշի մարզի Բերդի տարածաշրջանի «Մեհրաբներ» զորամասում զոհված լեյտենանտ Արտակ Նազարյանի գործով դատավարության հերթական նիստը կայացել էր փետրվարի 7-ին: Անկողնային հիվանդ լինելու պատճառաբանությամբ, նիստին չէր ներկայացել գործով առանցքային վկա Արման Նավասարդյանը: Դատարանը որոշել էր հրապարակել նրա նախաքննական ցուցմունքները: Դատական նախորդ նիստերին Ա. Նավասարդյանը ցուցմունքներ էր տվել եւ պատասխանել դատավարության մասնակիցների հարցերին:
Դատավորի այս որոշումից հետո՝ ամբաստանյալ Հակոբ Մանուկյանի պաշտպան Հրանտ Գեւորգյանը հայտարարել է , որ ցանկանում է դատավոր Սամվել Մարդանյանին բացարկ հայտնել եւ դրա դրա համար ողջամիտ ժամկետ է խնդրել: Դատավոր Մարդանյանը դատը մի ժամով հետաձգել էր: Սակայն այն լրանալուց հետո, ժամը 15.30-ին պաշտպանը հայտնել էր, որ բացարկը նախապատրաստելու համար ժամանակը չի բավարարել, դատարանը դրա համար եւս մի ժամով հետաձգել էր նիստը: Այդ ընթացքում Հ. Գեւորգյանը դատարանին դիմում էր ներկայացրել, որով դատարանին խնդրել էր իրեն տրամադրել նախորդ նիստերին իր կողմից դատավորին հայտնած բացարկների վերաբերյալ դատարանի կայացրած որոշումները, դատական նիստերի ձայնագրությունները` կրիչներով , համակարգիչ եւ առանձին սենյակ: Դատարանը պաշտպանին տրամադրել է դրանք, Հ. Գեւորգյանի պաշտպանյալ Հակոբ Մանուկյանն էլ դատարանում հայտարարել էր, որ դատական նիստերի ձայնագրությունները` կրիչներով, ինքը դատարանից ստացել է եւ տվել իր պաշտպանին: Ժամը 17.30-ի սահմաններում Հրանտ Գեւորգյանը լքել էր դատարանի դահլիճը` չներկայացնելով ինքնաբացարկի միջնորդություն: Դատարանը նրա նկատմամբ որոշում է կայացրել` դիմել փաստաբանական պալատ Հրանտ Գեւորգյանին կարգապահական պատասխանատվության ենթարկելու համար:
Հաջորդ նիստը նշանակված էր փետրվարի 8-ին ժամը 11-ին: Այն սկսվեց 15 րոպե ուշացումով, քանզի Երեւանից ուշացումով ժամանեց ամբաստանյալներ Հարութիկ Կիրակոսյանի, Ադիբեկ Հովհաննիսյանի եւ Մխիթար Մխիթարյանի պաշտպան Ալվարդ Մնացականյանը:
Նիստին չէին ներկայացել տուժողի իրավահաջորդը, նրա ներկայացուցիչները, ամբաստանյալ Հակոբ Մանուկյանի պաշտպան Հրանտ Գեւորգյանը, պաշտպան Ազատ Շահբազյանը:
Կարդացեք նաև
Հրանտ Գեւորգյանը դատարանին դիմումով հայտնել էր, որ նիստին չի ներկայանալու՝ դատարանից իր բնակավայրի մեծ հեռավորության եւ ճանապարհների վտանգավոր լինելու պատճառով:
Փետրվարի 8-ի դատական նիստում ամբաստանյալ Հակոբ Մանուկյանը միջնորդեց հետաձգել դատական նիստը, որպեսզի իր պաշտպանը մասնակցի դատին: Դատարանը որոշեց հետաձգել նիստը եւ հաջորդ նիստը նշանակեց փետրվար 14-ին, ժամը 14-ին:
Ոսկան ՍԱՐԳՍՅԱՆ
