Փետրվարի 12-ին Իջեւանից 11 կմ հեռավորությամբ գտնվող Խաշթառակ գյուղում կայացան համայնքի ղեկավարի ընտրություններ: Դրանք անցան ընտրողների ակտիվ մասնակցության պայմաններում: Ցուցակային 1418 ընտրողներից ընտրությանը մասնակցել է 1070-ը: Կեսօրին մի քանի ժամ ընտրական տեղամասի մուտքի մոտ հերթեր էին գոյացել, ընտրողները դժգոհում էին, փորձում հերթում առաջ անցնել: Սակայն ծառայություն իրականացնող ոստիկաններին եւ տեղամասային ընտրական հանձնաժողովի անդամներին հաջողվեց կարգ հաստատել: Չնայած գյուղի ճանապարհները սառցապատ եւ վտանգավոր էին, ընտրություններին մասնակցեցին նաեւ մեծ դժվարությամբ տեղաշարժվող ծերեր, մանկահասակ երեխաներին գրկած կանայք: Եթե նկատի ունենանք, որ շուրջ 200 խաշթառակցի ներկայումս բացակայում է համայնքից, կարող ենք համարել`ընտրությանը գրեթե բոլոր խաշթառակցիներն են մասնակցել: Գործող համայնքապետի` ՀՀԿ-ի կողմից առաջադրված,ՀՀԿ անդամ Հայկ Քամալյանի օգտին տրվել է 466, ԲՀԿ անդամ, ինքնառաջադրմամբ հանդես եկած Անդրանիկ Վիրաբյանի օգտին`296, նախկին գյուղապետ, ՀՀԿ անդամ, ինքնառաջադրմամբ հանդես եկած Արթուր Վանեսյանի օգտին` 285 ձայն: Նման արդյունքը սպասելի էր, քանի գործող գյուղապետի դեմ «ընդդիմադիր» 2 թեկնածուի դեպքում նրա դեմ տրված ձայները կիսվեցին, ինչն էլ ապահովեց գործող գյուղապետի վերընտրությունը: Նշենք, որ Հայկ Քամալյանը 2008թ.-ին համայնքի ղեկավար ընտրվելով` անցած 4 տարում ակտիվ գործունեություն է ծավալել: Բացի համայնքի ղեկավարի պաշտոնական պարտականությունները կատարելուց, նա չի զլանում գյուղում կատարվող շինարարական աշխատանքների ժամանակ որպես հյուսն եւ եռակցող անշահախնդիր օգնել համագյուղացիներին: Ընտրությունների վերաբերյալ բողոքներ չկան: Սակայն ուշադրության է արժանի այն հանգամանքը, որ քվեարկության 1070 մասնակիցներից 109-ը քվեարկել է այլ անձի օգնությամբ: Դա կատարվում էր հետեւյալ կերպ` տարեց մարդիկ մոտենում էին տեղամասային ընտրական հանձնաժողովի անդամներին եւ հայտնում. «աչքս չի տեսնում»: Հանձնաժողովի քարտուղարը մատյանում գրանցում էր օգնողի անձնագրի տվյալները եւ տարեց մարդը կողմնակի օգնությամբ քվեարկում էր: Սակայն վատ տեսողությունից դժգոհող նույն անձը մինչ այդ, քվեաթերթիկ ստանալու համար տեղամասային ընտրական հանձնաժողովի մատյանում, պահանջվող տողում ստորագրում էր առանց դժվարության: Զարմանալի է վատ տեսողությամբ խաշթառակցիների նման մեծ թիվը, քանի որ, մեր տվյալով, անցած տարիներին գյուղում ակնոցներ բաժանելու բարեգործական ակցիաներ են իրականացվել: Չի բացառվում, որ գալիք խորհրդարանական ընտրություններին իշխանությունն օգտագործի այս «նորամուծությունը»` վստահ լինելու համար, որ հանրապետական կուսակցության թեկնածուից ընտրակաշառք ստացած կամ նրան ընտրելու խոստում տված անձը քվեարկելու ժամանակ չի խաբի:
Ոսկան Սարգսյան
