Մեղրու տարածաշրջանի Կարճեւան գյուղում առաջիկա խորհրդարանական ընտրություններին ընդառաջ նորմալ մթնոլորտ է տիրում: Գյուղապետը «Բարգավաճ Հայաստան» կուսակցության ներկայացուցիչ է: «Կարճեւանում գրեթե բոլոր այսօրվա ավելի ակտիվ կուսակցությունների հավանողներ կան, եւ միանշանակ, ըստ իս, բոլորն էլ իրենց չափով իրենց ձայները կհավաքեն: Տարբեր կուսակցությունների ներկայացուցիչներ կան գյուղում, բայց հիմնականում գերակշռում են ԲՀԿ եւ ՀՀԿ կուսակցականները», -ասում է Կարճեւանի գյուղապետ Արմեն Ավետիսյանը:
Նախորդ խորհրդարանական ընտրություններում գյուղում կայացած քվեարկությամբ ԲՀԿ-ն առաջատար էր՝ մոտ 70 տոկոս, երկրորդ տեղում ՀՀԿ-ն էր: Գյուղապետը հավելում է, որ այս անգամ էլ են փորձելու նախորդ ընտրությունների արդյունքները ստանալ` հավաքելով 50 տոկոսից ավելի քվե ԲՀԿ-ի օգտին, որը չի խանգարի մյուս կուսակցությունների ներկայացուցիչներին քվեարկել իրենց նախընտրած կուսակցության օգտին:
Մերի ՍՈՂՈՄՈՆՅԱՆ
